کویټه : مرکزی تحقیقاتي ادارې چارواکو په کویټه کې د نادرا درې کارکوونکي د هغو راپورونو له مخې نیولي چی دوی په غیرقانوني توګه بهرنیانو ته د کمپیوټرائزډ ملي پېژند ګلو کارډونه جاري کړي دي
ابتدائی معلومات ښیې نیول شوي کسان انور شاه (د کویټې رېجنل هیډ افیس)، او اختر شاه او خواجه وقاص (د چمن زون جونیئر افسران ) دي
د اداری سرچینو ویلي چې یاد کارکوونکو په زیاتو پیسو اخیستو سره بهرنیانو لپاره د پاکستان پېژندپاڼې جوړولې. دغه جعلي شناختي کارډونه وروسته د پاکستاني پاسپورټ د تر لاسه کولو او د سعودي عربستان سفر لپاره کارول کېدل
دا خبرونه هغه وخت مخی ته راغلل کله چې د سعودي عرب چارواکو څو کسان د مشکوکو جعلی اسنادو له امله ونیول. له نیولو وروسته سعودي چارواکو په رسمي ډول د پاکستان حکومت خبر کړ چې په جدي توګه دا ستونزه وڅېړي، او له دې وروسته سمدستي ایف ایی اې پلټنې پیل کړې
د ایف ایی ای چارواکو تورن نادرا کارکوونکي د بیان ورکولو لپاره وغوښتل، او تر لومړنۍ پلټنو وروسته یې د نورو تحقیقاتو لپاره په خپله ولقه کې واخستل
پاکستان او جعلي پېژندګلو ستونزه
پاکستان له کلونو راهیسې له دې لویې ستونزې سره مخ دی چې بهرنیان، په ځانګړي ډول د بلوچستان او خیبرپښتونخوا د پولو په سیمو کې مېشت افغان او نور اتباع، هڅه کوي د پاکستاني اسنادو تر لاسه کولو لپاره جعلي لارې وکاروي. نادرا چې د هېواد د تابعیت مرکزي ډیټابېس اداره ده، تر دې وړاندې هم سلګونه کارکوونکي د جعلي پېژندپاڼو په جوړولو کې د لاس لرلو له امله لرې یا نیولي دي
دغه ډول پېښې یوازې د پاکستان د کورني امنیت لپاره خطر نه جوړوي، بلکې له هغو هېوادونو سره اړیکې هم زیانمنوي چې ډېری پاکستانیان پکې کار کوي، لکه سعودي عربستان او متحده عربي امارات. جعلي اسناد ډېری وخت د خلکو د نیول کېدو، واپس کېدو، یا د ویزو د بندیز لامل جوړیږی
په کویټه کې تازه نیونې د دې پراخې او مهمې مبارزې برخه ده چې د پاکستان حکومت یې د جعلي پېژندپاڼو او د غیرقانوني اسنادو د کړۍ پر ضد روانه کړې. چارواکي وايي چې د پلټنو د پراخېدو سره ممکن نور کسان هم ونیول شي