د افغانستان په هرات ولایت کې د مدني ټولنو او د بشري حقونو د سازمانونو غړو د طالبانو د وروستي امر پرضد یو پیاوړی اعتراض ترسره کړ، چې له مخې یې د ښځو لپاره د برقع (چادري) اغوستل اجباري ګرځول شوي دي.
په دې سمبولیک اقدام کې، د ښځو فعالانو برقعې وسوځولې او دا پرېکړه یې د ښځو پر وقار او بنسټیزو انساني حقونو حمله وبلله. دا مظاهره د سختو امنیتي محدودیتونو تر سیوري لاندې ترسره شوه او د افغان ښځو د زیاتېدونکي قهر او نا رضایتۍ څرګندونه یې کوله، “زه ښځه یم، سیوری نه یم” ، د مظاهرې پر مهال، فعالانو هغه شعارونه پورته کړل او خپاره کړل چې اوس د افغانستان په ټولنیزو شبکو کې پراخ خپاره شوي دي. د دوی شعارونه دا وو
زه ښځه یم، سیوری نه یم ، زما غږ مه چوپوه
ساه اخیستل زموږ حق دی
آبي رنګ د جبر نښه نه ده
برقع د هغه مرغه قفس دی چې لا هم سندرې وایي
آسمان او زه دواړه آبي رنګ لرو، خو آسمان آزاد دی
دا علامتی پیغامونه دا څرګندوي چې د طالبانو وروستی حکم څنګه د ښځو هویت، ازادي او لید تر سیوري لاندې راولي او هغوی په چوپتیا او پټتیا مجبوروي. د مدني ټولنو دا غبرګون دې چې د افغان طالبانو د ا پریکړه د ښځینه وګړو دښمنه پریکړه ده او دا به دوی هیڅ کله هم و نه زغمي
په سوشل میډیا یوه ویډیو خپره شوې، په ویډیو کې ښکاري چې یوه ښځینه فعاله د افغان طالبانو پر ضد احتجاج کوي او خپله برقع سوځوي
د مدني ټولنو فعالانو دا دریځ وو چې ښځې د برقع اغوستلو ته مجبوره کول د اسلامي، انساني او اخلاقي ارزښتونو خلاف دي، وې ویل چې د افغانستان ښځې حق لري چې په ازاد ډول په ټولنه کې برخه واخلي، په عزت، برابري او له وېرې پرته ژوند وکړي، د مدني ټولنې فعاله ښځې ټینګار کوي چې د برقع اغوستل په اسلام کې هیڅ مذهبي اساس نه لري، بلکې دا د ظلم او استثمار نښه ده
نړیوالو څخه غوښتنه
فعالو ښځو له نړیوالې ټولنې، ملګرو ملتونو او نړیوالو بشري حقونو سازمانونو وغوښتل چې د افغانستان د ښځو د حقونو د منظم سرغړونو پر وړاندې چوپ پاتې نه شي او د دې تبعیضي او غیر انساني کړنو د مخنیوي لپاره ژر او اغېزمن اقدامات ترسره کړي
پر افغان ښځو د بندیزونو دوام
له هغه راهیسې چې طالبان په ۲۰۲۱ کال کې بیا واک ته رسېدلي، دوی پر ښځو یو لړ سخت بندیزونه لګولي دي چې پکې د لوړو زده کړو بندیز، د کار محدودیتونه، د نارینه سرپرست پرته د سفر بندیز او د اجباري حجاب پلي کول شامل دي.د هرات دا مظاهره د هغو لږو ښکاره اعتراضي خوځښتونو څخه ده چې ښځو د دې سختو محدودیتونو تر سیوري لاندې ترسره کړې، او دا د افغان ښځو د زړورتیا، مقاومت او نه تسلیمېدو څرګندونه کوي
دلته مهمه ده او باید یادونه وشی چې کله نه چې افغان طالبانو په واک کې راغلي دي نو په هرات کې د افغان طالبانو پر ضد ښځینه فعالانو یو شمیر احتجاجونه کړي او له ی طالبانو ی غوښتي چې دوی دې له ښځینه حقونو څخه سرغړونه نه کوي