فلسطین د یو ازاد ریاست په توګه د پیژندلو په اړه د بلجیم هیواد یوه مهمه پریکړه مخې ته راغلې ده
بلجیم د فلسطین په رسمیت پېژندلو پرېکړه کړې او پر اسرائیل ی سخت بندیزونه اعلان کړي دي.
د فرانس، برتانیې، آسترالیا او کاناډا وروسته، بیلجیم هم پرېکړه کړې چې فلسطین د یو خپلواکې دولت په توګه په رسمیت وپېژني.
د بیلجیم د بهرنیو چارو وزیر میکسم پریوټ په ټولنیزو رسنیو کې په خپاره شوي پیغام کې ویلي، چې دی به روانه میاشت د ملګرو ملتونو د عمومي اسمبلۍ په غونډه کې د فلسطین د دولت په رسمیت پېژندلو اعلان وکړي. نوموړي همداراز پر اسرائیل د سختو بندیزونو د لګولو اعلان وکړ.
د بهرنیو چارو وزیر په وینا، د اسرائیل پر ضد په ملي کچه ۱۲ جدي بندیزونه عملي کېږي، چې پکې د غیرقانوني اسرائیلي مېشت ځایونو څخه د توکو د وارداتو بندیز، له اسرائیلي شرکتونو سره د دولتي قراردادونو له سره ارزونه او د اسرائیلي الوتنو او ټرانزټ مخنیوی شامل دي.
میکسم پریوټ وویل، دغه ګامونه د فلسطین په ځانګړي ډول په غزه کې د روان بشري ناورین او د اسرائیل له لوري د نړیوالو قوانینو د سرغړونو پر وړاندې اخیستل شوي دي. په بیان کې ټینګار شوی چې دا بندیزونه د اسرائیل د ولس پر ضد نه دي، بلکې پر حکومت یې د فشار لپاره دي څو د نړیوالو او بشري قوانینو درناوی وکړي.
دلته باید یادونه وشي چې بیلجیم لومړنی هېواد نه دی چې د فلسطین د دولت په رسمیت پېژندلو پرېکړه کوي. له دې وړاندې فرانس، برتانیه، آسترالیا او کاناډا هم پرېکړې کړې دي او فلسطین ی د یو خپلواک ریاست په توګه د پیژندلو اعلان کړې.
باید دا هم یادونه وشی چې د روانې میاشتې د ملګرو ملتونو په عمومي اسمبلۍ کې یې د رسمي اعلان تمه کېږي