تېر ورځ د پاک افغان ګډې سوداګرۍ او صنعت خونې (پاک افغان جائنټ چیمبر آف کامرس ) د سینیئر نائب صدر ضیاء الحق سرحدي په مشرۍ کښې درې کسیز پلاوي چې پکښې د خونې اجرائیه غړي شجاع محمد او عمار احمد انصاري شامل وو، د خیبرپښتونخوا له ګورنر فیصل کریم کنډي سره په ګورنر هاوس پېښور کښې مهمه لیدنه وکړه
په دې لیدنه کښې د صوبې د صنعت او د پاک افغان تجارتي اړیکو په اړه مهمو موضوعاتو باندې خبرې وشوې. پلاوي ګورنر ته وویل چې په خیبرپښتونخوا کښې څلور صنعتي زونونه جوړ شوي، خو دا مهال د بېلابېلو ستونزو سره مخ دي چې له امله ی په صوبه کې صنعتي هلې ځلې اغېزمنې شوې دي
د پلاوي په وینا، د افغان ټرانزټ ټریډ په اړه د صوبايي حکومت د ټیکس پالیسۍ له امله تجارتي فعالیتونه سخت زیانمن شوي او له دې امله تر اوسه له اوو نیم زرو څخه زیات کانټینرونه د چمن بلوچستان په لور منتقل شوي دي، چې نه یوازې د صوبې کاروبار ته تاوان رسوي بلکې د منځنۍ اسیا سره سوداګرۍ ته زیان رسوي
پلاوي دا هم وویل چې د افغان ټرانزټ ټریډ په چارو کې د این ایل سي ځینې پالیسۍ هم ستونزې پیدا کوي چې باید زر تر زره یې حل را اوویستل شي. پلاوي وړاندیز وکړ چې د خیبرپښتونخوا د ګورنر په سرپرستۍ کښې دې یو سټیرینګ کمیټي جوړه شي چې د سوداګرو او اړوندو ادارو سره په ګډه دغه ستونزې هوارې کړي
ګورنر خیبرپښتونخوا فیصل کریم کنډي پلاوي ته ډاډ ورکړو چې د صوبې د صنعتي پرمختګ او د پاک افغان تجارت د ستونزو د حل لپاره به هر اړخیز ګامونه پورته شي او د اړوندو ادارو سره په خبرو اترو سره به ډیر زر مثبت پرمختګ وشي. هغه وویل چې د کاروبار په پرمختګ سره به صوبه سوکاله شي او د پاکستان په پرمختګ کښې د سوداګرو او کروندګرو رول ډېر مهم دی ځکه دوی په منظم ډول حکومت ته ټیکس هم ورکوي. ګورنر وویل چې د خیبرپښتونخوا سوداګرو ته چې د وفاق په کچه کومې ستونزې دي، د هغو ستونزو هواري لپاره به ګورنر هاوس د وکیل په توګه رول ولوبوي ترڅو چې د سوداګرو دا ستونزې هواري شي