څو ورځې وړاندې د پاکستان حکومت افغان ټرانسپورټرانو لپاره په عارضی اسناد،ټیډ باندې د سفر کولو موده تر ۷م جولایی غځولې وه او چې دوه ورځې وړاندې دا موده ختمه شوه نو په تورخم پوله په سلګونو تجارتي مالونو ډک ګاړي بند پاتې شو
په تورخم کې ټرانسپورټرانو ستونزه په پام کې نیولو وروسته د پاکستان سوداګرۍ وزارت د زیارت په ورځ لسم ۱۰ د جولایی یوه مراسله جاري کړه، په مراسله کې د ټیډ اسنادو موده تر ۳۱م جولایی پورې وغځول شوه
پاک افغان جاینټ چیمبر ، خیبر چیمبر او افغان ټرانسپورټرانو او په تورخم کې ایمپورټ ایکسپورټ کاروبار سره تړلي سوداګرو د پاکستان دا پریکړه په ښو ټکو کې وستایله او وی ویل چې دې پریکړې سره سوداګر د لوی تاوان څخه بچ شو
دلته ددې خبری باید یادونه وشی چې چې په تیرو دو ورځو کې په تورخم کې په سلګونو د تازه میوې او سبزۍ ډک ګاړي بند پاتې وو او که دا ډک ګاړي نه وې پریښودل شوي نو سوداګرو ته به کروړونه روپۍ تاوان ور اووښتې وې
یو افغان ټرانسپورټر شاه جي رسنیو ته ویلي دي چې د پاکستان حکومت دا پریکړه ستایی. هغه غوښتنه وکړه چې په ویزه ورکولو کې دې نرمي وشي او په کم وخت کې دې ویزه ټرانسپورټرانو ته ورکړل شي چې ددوی کاروبار اغیزمن نه شی او دواړو هیوادونو اقتصاد ته ګټه ورسي
د خیبر چیمبر آف کامرس یو غړې او ایګزیکټیو ممبر حاجي ظاهروالله شینواري د پاکستان حکومت دا پریکړه وستایله خو غوښتنه ی وکړه چې حکومت دې د ویزه په ورکولو کې نرمي وکړي او فیس دې هم کم کړي
قاري نظیم ګل شینواري هم په پاک افغان پوله د دوه اړخیزه تجارت سره تړلې شخصیت دې او سینیر کسټم کلیرینس ایجنټ هم دې، وایی چې د پاکستان حکومت دې پریکړې سره په تورخم کې سلګونه ټرکونه چې د تجارتي مالونو ډک وو پاکستان ته د راننوتلو اجازه ورکړل شوه او سوداګر د تاوان بچ شو
نوموړي اوویل او غوښتنه ی وکړه چې حکومت باید ټرانسپورټرانو ته د ویزه جاري کولو په لور پام وکړي او ټرانسپورټرانو ته په کم وخت کې ویزه جاري کړي ځکه چې نن سبا له افغانستان لوري هم او د پاکستان لوري هم د تازه میوو سیزن دې او که په کم وخت کې ویزه دوی له ورکړل شی نو دې سره به ټرانسپورټران او سوداګر له تاوان څخه بچ شی او دا به د دواړو هیوادونو د اقتصاد په ګټه تمام شي