د خیبر پښتونخوا په صوابۍ کې د ټایپ ون شکر ناروغۍ (ډایبېټیز) سره مخ ماشومانو لپاره د وړیا درملنې یو مهم مرکز پرانیستل شو. دا مرکز د صوابۍ په تحصیل هیډکوارټر روغتون (کوچنی لاھور) کې جوړ شوی دی او “چینجینګ ډایبېټیز اِن چلډرن” (CDiC) تر سرلیک لاندې ماشومان ته وړیا انسولین، طبي معاينه او د ناروغۍ په اړه پوهاوی ورکوي.
د پرانیستغونډې خاص مېلمانه د صنعت او تجارت صوبایي وزیر عبدالکریم تورډھیر او د خیبرپښتونخوا د اسمبلۍ پخوانۍ مرستیاله ډاکټره مهرتاج روغاني وو. دغه شان د بورډ آف ګورنرز مشر، غړي، د بخشي خان میډیکل کمپلیکس (BKMU) اداره، او د شریکو ادارو استازي هم په دغه موقع موجود وو.
طبی پوهانو وایی په پاکستان کې د شکر ناروغانو شمېر تر ۴ کروړه اوښتی دی، چې له دې ګروپ څخه شاوخوا ۸۰ زره ماشومان د ټایپ ون ډایبېټیز ښکار دي. او د دوی په وینا، د دې ناروغانو اصلي شمېر ښايي تر دې ډېر وي، ځکه چې د پوهاوي او تشخیص د نشتوالي له امله ډېر ماشومان نه ثبتېږي. دوی پر والدینو ټینګار وکړ چې له شرم یا وېرې پرته خپل ماشومان مرکز ته راولي، تر څو هغوی ته وړیا او په وخت درملنه ورکړل شي