د پاکستان خلاف د هندوستان پروپګنډا او بے بنياده الزامات نړي ته په ډاګه کولو لپاره په سفارتي کچ د پاکستان کوششونه جاري دي، د پيپلزپارټۍ چيئيرمين بلاول بهټو زرداري په مشرۍ کښې امريکې ته تلي نهه کسيزه وفد په نيويارک کښې د سلامتي کونسل د مختلف ملکونو د نمائندګانو سره ملاقاتونه کړيدي او ورسره ئې د جنوبي ايشيا په صورتحال او د پاکستان او هندوستان ترمينځ پيدا شوي تاؤ تريخوالي په معاملو خبري کړيدي ۔ پاکستاني وفد د پهلګام حملې نه پس د پاکستان خلاف د هند حکومت د مهم او بغير د څه اشتعال د پاکستان په مختلف ښارونو حملې او د دې په رد عمل کښې د پاکستان جوابي کارروائۍ نه د سلامتي کونسل غړي خبر کړيدي او په ټولو واقعاتو ئې ورته تفصيلي بريفنګ ورکړېدے۔ پاکستاني وفد د متحده قامونو لپاره د او آئي سي سفيرانو سره هم ملاقات کړېدے او ورسره ئې د سيمې سيکيورټۍ په معاملو خبرې کړېدي،په دې موقع بلاول ووئيل چې نريندر مودي د پهلګام واقعې تحقيقات کوؤلو نه بغير په پاکستان تورونه ولګول او وروستو ئې د پاکستان کښې په جوماتونو او د عام خلکو په ودانو حملې وکړې او بے ګناه کسان ئې شهيد کړل ۔ د متحده قامونو لپاره د امريکې مستقل مندوب ډوروتهي شيا سره هم پاکستاني وفد ليده کاته کړيدي ۔ امريکني وفد سره ملاقات دوران بلاول بهټو زرداري د پاکستان او هند ترمينځ جنګ بندۍ په حواله د صدر ډونلډ ټرمپ کوششونو ستائيلي دي او د امريکني واکمنو شکريه ئې ادا کړيده ۔ بلاول د امريکې او نړي والې ورورولۍ نه مطالبه کړيده چې د هندوستان لخوا سند طاس معاهده معطل کولو نوټس دې واخلي ۔ د دې ملاقاتونو وروستو په ايکس پاڼه ورکړي شوي بيان کښې بلاول بهټو زرداري دا ملاقاتونه ګټه ور بللي دي او وئيلي ئي دي چې د متحده قامونو او سلامتي کونسل ممبران ئې د هند د جارحيت نه خبر کړيدي ۔ د بلاول بيان ترمخه د چين مندوب فوکانګ د سيمې امن او استحکام لپاره د پاکستان کوششونو ستائينه کړيده او دواړو ملکونو د هر قسم جارحيت مخالفت کولو باندې اتفاق کړېدے