ایراني رسنیو راپور ورکړی چې ایران لا هم له امریکا سره د مذاکراتو د بل پړاو لپاره چمتو نه دی، چې له امله یې په سیمه کې د تاوتریخوالي د زیاتېدو اندېښنې پیدا شوې دي
ایران یو ځل بیا د هرمز تنګی د تړلو اعلان کړی، چې له دې سره په نړیواله کچه اندېښنې زیاتې شوې دي. د راپورونو له مخې، ایراني پوځ ویلي چې دا ګام د امریکا د ناکه بندۍ په ځواب کې اخیستل شوی او تر هغې به دوام وکړي څو چې د امریکا له لوري لګول شوي بندیزونه پای ته ونه رسېږي
د خاتمالانبیا مرکزي قومندانۍ ویاند ویلي چې د هرمز تنګی دا مهال بشپړ د ایران تر کنټرول لاندې دی او په سیمه کې امنیتي تدابیر ډېر سخت شوي دي. چارواکي وایي دا اقدام د ملي حاکمیت د ساتنې او د بهرني فشار پر وړاندې د غبرګون په توګه ترسره شوی دی
مجتبی خامنهاي د ایران د پوځ د ورځې په مناسبت په خپل وروستي لیکلي پیغام کې د هرمز تنګي او د ایران-امریکا مذاکراتو په اړه کوم څرګند دریځ نه دی خپل کړی
ایراني بحري ځواک خبرداری
په خپل پیغام کې مجتبی خامنهاي “دښمنانو” ته خبرداری ورکړی او ویلي یې دي چې ایراني بحري ځواک چمتو دی څو هغوی ته “نوې ماتې” ورکړي، خو نور جزئیات یې نه دي ورکړي
په ایران کې د پوځ د ورځې اهمیت
په ایران کې د ۱۹۷۹م کال له اسلامي انقلاب وروسته دا ورځ د پوځ د ورځې په توګه نمانځل کېږي. مجتبی خامنهاي په خپل پیغام کې پوځ “د اسلام پوځ” بللی او د هغوی دفاعي وړتیاوې یې ستایلې دي
راپورونه وایي چې مجتبی خامنهاي د مارچ له پیل راهیسې، چې د ستر مشر په توګه ټاکل شوی، په عامه توګه نه دی راڅرګند شوی او تر اوسه یې ټول پیغامونه یوازې په لیکلې بڼه خپاره شوي دي
د هرمز تنګي کې دوامداره تاوتریخوالی
بل لور ته، د هرمز تنګي وضعیت لا هم ترینګلی دی. د امریکا مرکزي قومندانۍ ویلي چې د ناکه بندۍ له امله ۲۳ کښتۍ بېرته ګرځول شوې دي، او ایران هم په ځواب کې په دې تنګي کې خپل کنټرول نور هم سخت کړی دی.
د ایران دریځ: د امریکا اقدام “سمندري قزاقي”
ایراني چارواکو د امریکا اقدامات “سمندري قزاقي” بللي او ویلي یې دي چې تر هغه چې د ایراني کښتیو پر تګ راتګ بندیزونه ختم نه شي، په هرمز تنګي کې به کلک نظارت دوام ولري
مذاکراتو کې نامعلوم وضعیت
ایراني رسنۍ وایي چې ایران لا هم د امریکا سره د خبرو راتلونکی پړاو نه دی منلی، چې له امله یې په سیمه کې د کړکېچ د لا زیاتېدو احتمال شته
د خلیجي هېوادونو غوښتنه
قطري دفاعي کارپوه نواف الثاني ویلي چې د خلیج هېوادونه غواړي وضعیت بېرته عادي حالت ته وګرځي او په هرمز تنګي کې د کښتیو ازاد تګ راتګ وساتل شي