Skip to content 
ټانک / ډېره اسماعیل خان: د پولیسو چارواکی وایی د ګل په ورځ لږ تر لږه شپږ پولیس سرتېري هغه مهال شهیدان شول کله چې د ریموټ کنټرول آی ای ډي بم د خیبر پښتونخوا د ټانک ضلعې د ګومل بازار سړک پر سر د پولیسو له زغره وال ګاډي سره نږدې وچاودېدو
دا چاودنه د کوټ ولي سیمې ته نږدې، چې له ټانک ښار شاوخوا ۲۵ کیلومتره لرې پرته ده، کی رامنځته شوه چی له امله یې زغره وال ګاډی په بشپړ ډول ویجاړ شو. یاد ګاډی د برید پر مهال پر معمول ګزمه بوخت و.
د پولیسو د سرچینو له مخې، په شهیدانو کې ایس ایچ او اسحاق، اے ایس آی شیر عالم، شفیع، حضرت علي، احسان الله او مجید (ډرایور) شامل دي.
له چاودنې وروسته، د ریسکیو ۱۱۲۲ ټیمونه د پېښې ځای ته ورسېدل او د شهیدانو جسدونه یې نږدې روغتون ته ولېږدول.
امنیتي ځواکونو سیمه کلابنده کړه او د بریدګرو د نیولو لپاره یې د لټون او پاکولو عملیات پیل کړل، تر دی دمه کومې ډلې د برید ذمه واري نه ده منلې او امنیتي ځواکونو په سیمه کې د ترهګرو پر ضد پلټنې پیل کړي دي
