اروپايي ټولنې د عمومي امتيازي سکيم پلس د چوکات لاندې د ۲۷ نړيوالو کنوانسيونونو د پلي کېدو په برخه کې د پاکستان پرمختګ په ښو ټکو کې ستایلې دې
دغه کنوانسيونونه د بشري حقونو، مزدورانو د حقونو، شفاف حکومتولۍ او چاپېريالي ساتنې له مهمو برخو سره تړاو لري
د اروپايي ټولنې وینا ده د چی ایس پی پلس حيثيت د پرمختيايي هېوادونو لپاره يوه ځانګړې امتيازي لاره ده چې موخه يې دوامدار پرمختګ او ښه حکومتولي هڅول دي
د دې سکيم لاندی د پاکستان نږدې دوه پر درېيمه برخه صادرات اروپايي ټولنې ته له ګمرکي محصول پرته لاسرسی لري
د پاکستان د بهرنيو چارو وزارت وایي د پاکستان او اروپايي ټولنې د ګډ کمېسيون پنځلسمه غونډه د ډسمبر په ۱۷مه په بروکسل کې ترسره شوه، چې پکې د دواړو لوريو ترمنځ د بېلابېلو برخو د همکارۍ او پرمختګ جاج واخيستل شو.
په دې غونډه کې د پاکستان له لوري د ۲۷ نړيوالو کنوانسيونونو پر پلي کېدو هم بحث وشو. همدارنګه د پاکستان مرستيال وزيراعظم او د بهرنيو چارو وزير اسحاق ډار د دسمبر په لومړۍ نېټه د جمهوریت، حکومتولۍ، د قانون واکمنۍ او بشري حقونو د فرعي ډلې په غونډه کې هم ګډون کړی و
د حکومتی وینا ترمخه اروپايي ټولنې د پاکستان له لوري د مرګ سزا د نړيوالو معيارونو سره د سمون او د تشدد او ناوړه چلند پر ضد د لومړنيو ګامونو ستاينه کړې ده
د اقلیتونو لپاره د کمېسيون جوړېدل هم د پرمختګ په توګه ياد شوي دي
اروپايي ټولنې پر پاکستان ټينګار کړی چې د راتلونکې چی ایس پی پلس د څار راپور تر خپرېدو وړاندې دې بيړني ګامونه ګړندي کړي او د بشري حقونو او حکومتولۍ په برخه کې دې اصلاحات روان وساتي
په غونډه کې د بيان او رسنيو ازادي، جبري ورکېدنې، د قضايي خپلواکۍ، مذهبي ازادۍ او د لږکيو د حقونو پر موضوعاتو هم تفصيلي خبرې شوې دي
پاکستان اروپايي ټولنې ته د بشري حقونو د ملي عمل پلانونو لاندې د ترسره شوو پرمختګونو په اړه معلومات ورکړي او د بشري حقونو د ودې او ساتنې لپاره د ملي ادارو د هڅو تفصيل يې شريک کړي دي
اروپايي ټولنې د ښځو، ماشومانو، لږکيو، کارګرانو او کډوالو د حقونو، او همدارنګه د بيان د ازادۍ د خونديتوب لپاره د پاکستان د هڅو ملاتړ ته د دوام ژمنه کړې ده
پاکستان ته د کی ایس پی پلس حيثيت په ۲۰۱۴ کال کې ورکړل شوی و، چې وروسته تر هغې د پاکستان د ټېکسټايل صادراتو کې ۱۰۸ سلنه زياتوالی راغې
د ۲۰۲۳ کال په اکتوبر کې د اروپايي پارلمان له لوري د پاکستان په ګډون د پرمختيايي هېوادونو لپاره د چی ایس پی پلس موده د څلورو نورو کلونو لپاره، يعنې تر ۲۰۲۷ پورې، وغځول شوه
د اروپايي ټولنې د جی ایس پی پلس کنوانسيونونو د پلي کېدو د معلوماتو له مخې، پاکستان ټول ۲۷ نړيوال کنوانسيونونه توثيق کړي دي، چې وروستي يې د ملکي او سياسي حقونو نړيوال کنوانسيون او د تشدد او غير انساني چلند پر ضد کنوانسيون دي.
اروپايي ټولنې د څار په لړ کې ۱۳ مهمې برخې د لومړيتوب په توګه ټاکلې دي، چې پکې جبري ورکېدنې، د تشدد مخنيوی، د بيان او عقيدې ازادي او د لږکيو حقونه شامل دي
د نومبر په مياشت کې په پاکستان کې د اروپايي ټولنې سفير رائمونډس کاروبلس ويلي وو چې پاکستان ته اړتيا ده چی د چې ایس پی پلس تر چوکات لاندې خپلې ژمنې لا پياوړې عملي کړي.
هغه ټينګار کړی و چې دا به يو ځانګړی څارنيز ماموريت وي، چې د ټولو اړينو ملګرو ملتونو کنوانسيونونو د پلي کېدو جاج واخلي، څو د سکيم د شرايطو بشپړوالی تائيد شي
