اسلاماباد : پاکستان د دفاعي ځواکونو مشر فیلډ مارشل سید عاصم منیر په اسلامي نړۍ کې د پاکستان تاریخي او روحاني اهمیت څرګند کړی او وویلی دی چی الله تعالی پاکستان ته دا ځانګړی ویاړ ورکړی چې د حرمین شریفین له ساتونکو څخه دی
د ملي علماوو او مشایخو کنفرانس ته د وینا پر مهال فیلډ مارشل سید عاصم منیر وویل چې د ټولو اسلامي هېوادونو په منځ کې پاکستان د دې مقدس مسؤلیت له امله ځانګړی مقام لري۔ هغه ټینګار وکړ چې رښتینی عزت او ملي ځواک د وېش له لارې نه، بلکې د یووالي، سخت محنت او د علم د ترلاسه کولو له لارې تر لاسه کېږي
د هېواد د نظریاتي بنسټونو په اړه پوځي مشر د مدینې د دولت او د پاکستان د دولت ترمنځ ژوره اړیکه بیان کړه او ویې ویل چې پاکستان د ایمان، انصاف او ګډ مسؤلیت پر اصولو جوړ شوی دی
هغه د پاکستان دفاعي تړون تاریخي وباله او ویې ویل چې دا د ملي حاکمیت او اسلامي ارزښتونو د ساتنې د ژمنې څرګندونه کوي
فیلډ مارشل سید عاصم منیر له علماوو او مشایخو وغوښتل چې د ټولنیز همغږۍ، ملي یووالي او اخلاقي لارښوونې په وده کې فعاله ونډه واخلي، ځکه چې د دولت او ټولنې ترمنځ یووالی د ثبات او پرمختګ ضامن دی په کنفرانس کې ګډون کوونکو علماوو او مشایخو د پوځي مشر څرګندونې وستایلې او د ملي یووالي، سولې او د هېواد له آئیني او نظریاتي بنسټونو سره یې خپله ژمنتیا بیا تکرار کړه
نورخبرونه: فیلډ مارشل عاصم منیر: پاکستان امن خوښونکي هېواد دی