پیښور: له پنجاب څخه خیبرپښتونخوا ته د غنمو او اوړو په ترسیل کې خنډونه او یو شمیر ستونزې رامخې ته شوي دي او دې ستونزو هوارولو لپاره له وفاقي حکومت څخه د سمدستي مداخلې غوښتنه شوې ده
د خیبرپښتونخوا د حکومت د خوراک څانګې سېکرټرۍ د پاکستان د حکومت د قامي غذایي تحفظ او څېړنې وزارت ته یو مهم خط استولی چې پکې د پنجاب په ځینو چیک پوسټونو د غنمو او اوړو د بینالصوبایي ترسیل پر وړاندې د غیرقانوني خنډونو، اوړه په ولکه کې اخستلو او د واک د ناسم استعمالو ته اشاره شوې ده
په دې لیک کې ویل شوي چې خیبرپښتونخوا د غنمو له کمښت سره مخ صوبه ده او د خپلو اړتیاوو د پوره کولو لپاره تر ډېره پر پنجاب تکیه لري
د ترسیل پر لارو د خنډونو له امله په صوبه کې د اوړو کموالی رامنځته شوی او بیې ی هم په څرګند ډول لوړې شوې دي، چې دا وضعیت په ځانګړي ډول د روژې مبارکې په څېر د غذایي خوندیتوب لپاره یو جدي ګواښ بلل کېږي د خیبر پښتونخوا حکومت د خوراک سېکرټرۍ د اساسي قانون له مخې د بینالصوبایي ازادې سوداګرۍ د تضمین په رڼا کې غوښتنه کړې، چې په پنجاب کې اړوندو چارواکو ته دې سمدستي او روښانه لارښوونې ورکړل شي، څو د غنمو او د غنمو څخه جوړو شوو توکو په ترسیل کې هر ډول غیرقانوني او غیر مجاز خنډونه پای ته ورسېږي