تورخم: د پاکستان او افغانستان ترمنځ د شخړې له امله پاک افغان سرحد له تیرو درې میاشتو راهیسي تړلې دې چې له امله ی په افغانستان کې ګڼ شمیر پاکستاني زده کوونکي بند پاتې دي
د بارډر سرچینو ترمخه نن له افغانستان څخه ۲۸اته ویشت پاکستاني زده کوونکي له تورخم لارې پاکستان ته راغلل، زده کوونکو له پاکستان حکومت څخه ځانګړې مننه کړې چې بارډر په عارضي توګه ددوی لپاره خلاص کړو
راستانه شوي محصلین د مېډیکل، انجینرۍ او نورو تعلیمي څانګو کې د افغانستان په کابل او ننګرهار پوهنتونونو کې زده کړې کوي ، محصلینو وویل چې د تېرو درې میاشتو راهیسې د پولې د بندېدو له امله له سختو ستونزو سره مخ وو۔ د هغوی تعلیمي چارې اغېزمنې شوې، او د اوسېدو، خوراک څښاک او مالي لګښتونو ستونزو یې مشکلات نور هم زیات کړي وو
محصلینو زیاته کړه چې د پاکستان او افغانستان ترمنځ د روانې شخړې او د سرحد تړلو له امله سخت ذهني فشار سره مخ وو
پاکستان ته له رسېدو وروسته محصلینو او د هغوی کورنیو د پاکستاني چارواکو له لوري د تورخم پولې د لنډ مهال لپاره د پرانیستلو پرېکړه وستایله، خو ټینګار یې وکړ چې پوله دې په دایمي ډول پرانیستل شي، څو نور بند پاتې محصلین او پاکستاني وګړي هم هېواد ته راستانه شي۔
په دې موقع والدینو له حکومت څخه وغوښتل چې سرحدي تګ راتګ دې ژر تر ژره په بشپړه توګه بحال کړي۔ هغوی د پاکستان له حکومت او اړوندو ادارو غوښتنه وکړه چې په افغانستان کې د زدهکړو کوونکو محصلینو لپاره ځانګړې اسانتیاوې او روښانه پالیسي جوړه کړي، څو په راتلونکي کې له داسې ستونزو سره مخ نه شي
د یادونې وړ ده چې د تورخم پوله له تېرو درې میاشتو راهیسې د پاکستان او افغانستان ترمنځ د ترهګرو پر ضد د اقداماتو پر سر د رامنځته شوي اختلاف له امله تړلې پاتې ده، چې له کبله یې د دواړو هېوادونو ترمنځ تګ راتګ اغېزمن شوی او دوه اړخیزه سوداګري هم درېدلې ده
