کابل: د امو خبري شبکې د سرچینو په وینا، د طالبانو د بهرنیو چارو وزیر امیر خان متقي دا میاشت په وروستیو کې هند ته خپل ټاکل شوی سفر لغوه کړی، ځکه چې د ملګرو ملتونو د امنیت شورا د ده د سفر بندیز کې د معافیت غوښتنه رد کړې ده. .
کارپوهان وایي چې دا پرېکړه د طالبانو لپاره یوه ستره دیپلوماتیکه ماتې ده، ځکه ښيي چې نړیوال بندیزونه لا هم د دوی حکومت د نړۍ له هېوادونو سره د اړیکو له جوړولو منع کوي.
دلته مهمه ده او باید یادونه وشي چې څو میاشتې وړاندې روس اعلان وکړو چې دوی د افغانستان اسلامي امارت حکومت په رسمي توګه د پیژندلو پریکړه کړې ده.
سیاسي او امنیتي چارو پوهان وایی چې د روس لوري د طالبانو حکومت په رسمي پیژندل د افغان حکومت لپاره لویه بریا ده.
د امیر خان متقي د ۲۰۲۵ کال د اګست له ۲۷مې تر ۲۹مې پورې د هند سفر د طالبانو لپاره یو مهم ګام بلل کېده، ځکه چې دوی غوښتل له سیمې یو ستر جمهوریت او ځواک سره رسمي دیپلوماتیک اړیکې ټینګې کړي. خو کله چې د امنیت شورا د سفر بندیز معافیت رد کړ، نو نوي ډیلي خپله بلنه بېرته واخیسته . .
د ملګرو ملتونو کلک دریځ
د طالبانو پر مشرتابه د ۱۹۹۰ لسیزې له وروستیو او ۲۰۰۰ کلونو له لومړیو راهیسې د بشري حقونو د سرغړونو او ترهګرۍ په تور د سفر بندیز او د شتمنیو کنګل لګول شوي دي. .
دلته ددې خبرې باید یادونه وشي چې دا په روانه میاشت کې دوهم ځل دی چې امنیت شورا د امیر خان متقي د سفر غوښتنه ردوي او له دې وړاندې یې ټاکل شوی د پاکستان سفر هم د همدې لامل له کبله لغوه شوې دې. .
په دې اړه شنونکي زیاتوي چې دا پرلهپسې لغوه شوي سفرونه ښيي طالبان په خپله بهرنۍ تګلاره کې د توازن ساتلو له ستونزو سره مخ دي. سره له دې چې له هند او پاکستان سره د طالبانو غیر رسمي اړیکې د سوداګرۍ، ترهګرۍ ضد او بشري مرستو په اړه روانې دي، خو نړیوال حقوقي او دیپلوماتیک چوکاټ لا هم د دوی پر وړاندې ستر خنډ دی.
تر دې وړاندې د طالبانو د مشر محبالله وثیق په مشرۍ یو پلاوی هند ته سفر کړی و. په هغه مهال د هندي چارواکو هڅه وکړه چې نړیوال اصول په پام کې ونیسي او د طالبانو له حکومت سره یې د رسمي دیپلوماتیک پروتوکول د تطبیق څخه ډډه وکړه