د خارجه دفتر لخوا جاري شوي بيان کښې وئيلي شويدي چې خارجه وزير او نائب وزيراعظم د چين تيانجن ښار کښې د شنګهائي تعاون تنظيم د وزيرانو اجلاس په سائيډ لائن مهم ملاقاتونه کړيدي ۔ بيان ترمخه دې اجلاس کښې ګډون لپاره چين په دوره راغلې د روس خارجه وزير سرګۍ لاوروف د اسحاق ډار سره ليده کاته کړيدي او ورسره ئې د دواړو ملکونو تعلقات په معاملو خبرې کړيدي، دواړو مشرانو د پاکستان او روس اړيکو کښې مثبت پرمختګ باندې اطمينان څرګند کړېدے او وخت تيريدو سره سره دا تعلقات نور هم مضبوطولو د عزم اظهار ئې کړېدے ۔
دواړو خارجه وزيرانو تجارت،دفاع، کرکيله او توانائۍ بشمول نورو شعبو کښې همکارۍ باندې اتفاق کړېدے، ملاقات په مهال دوه اړخيزه اړيکو او سيمې امن او استحکام لپاره د رابطو او ملاقاتونو سلسله جاري ساتلو باندې زور راوړلې شوېدے، خارجه وزير اسحاق ډار خپل هم منصب سرګۍ لاوروف له د پاکستان دوره کولو بلنه ورکړيده کومه چې هغه قبول کړيده ۔ دواړو مشرانو د افغانستان بشمول د منطقې سيکيورټۍ په معاملو هم خبرې اترې کړيدي ۔
وروستو خارجه وزير اسحاق ډار د ايران د هم منصب عباس عراقچي سره ملاقات کړېدے او ورسره ئې د ايران اسرائيل جنګ بندۍ نه پس په صورتحال تفصيلي خبرې کړيدي ۔ اسحاق ډار د اسرائيلي حملو لوجې ايران کښې شوي قيمتي ځانونو په زيان د افسوس اظهار کړې او وئيلي ئي دي چې پاکستان به تل د مشکل په هره لمحه کښې د خپل ګاونډي ملک او د ايران وړوڼو خويندو سره اوګه په اوګه ولاړ وي ۔
خارجه وزير اسحاق ډار وئيلي دي چې ګاونډي ملکونو کښې امن او قلاري د پاکستان او د منطقې د ملکونو په مفاد کښې ده،د ملکونو ترمينځ تاؤ تريخوالي په جنګونه نه حل کيږي بلکه دې لپاره مذاکرات او سفارتي کوششونه کول لازمي وي ، اسحاق ډار وئيلي دي چې پاکستان به د منطقې امن،ترهه ګرۍ خاتمې او د شخړو حل لپاره خپل کردار جاري ساتي ۔
د ايران خارجه وزير عباس عراقچي د اسرائيل سره جنګ بندۍ په حواله د پاکستاني حکومت کوششونو ستائينه کړې او اسرائيلي جارحيت خلاف د ايران د موقف تائيد کولو باندې ئې د پاکستان شکريه ادا کړيده ۔ دې نه آګاهو اسحاق ډار د قازقستان بشمول د نورو ملکونو د خارجه وزيرانو سره هم ملاقاتونه کړي وو او ورسره ئې د شريکې دلچسپې په معاملو او سيمې په صورتحال خبرې کړې وې