د ایران د بهرنیو چارو وزیر عباس عراقچي او د پاکستان د لومړي وزیر مرستیال او بهرنیو چارو وزیر اسحاق ډار ترمنځ مهم ټیلیفوني تماس نیول شوی دی. د سرچینو ترمخه په دې تماس کې دواړو هېوادونو د دوه اړخیزو اړیکو، د سیمې پر سولې او ثبات، او په نړیوالو فورمونو کې پر ګډې همکارۍ خبرې وکړې
د ایران د بهرنیو چارو وزیر په ملګرو ملتونو کې د پاکستان اغېزمن او متوازن دریځ وستایه او دا یې د دواړو هېوادونو ترمنځ د همغږۍ او متقابل درناوي څرګنده نښه وبلله. په ورته وخت کې اسحاق ډار د پاکستان د بهرني سیاست پر بنسټیزو اصولو ټینګار وکړ، چې پکې د هېوادونو د خپلواکۍ او ځمکنۍ بشپړتیا درناوی، د کورنیو چارو په کې لاس نه وهل، د ترهګرۍ پر ضد څرګنده مبارزه، او د سیمې د سولې او ثبات لپاره ژمنتیا شامل دي
نوموړي وویل چې د پاکستان او ایران اړیکې پر تاریخي، کلتوري او مذهبي بنسټونو ولاړې دي، او اړتیا ده چې دا اړیکې په ټولو برخو کې لا پیاوړې شي. په خبرو کې دواړو لوریو د سیمې له ننګونو، په ځانګړي ډول د امنیتي مسایلو په برخه کې د نږدې همکارۍ پر دوام هوکړه وکړه او د ګډو ګټو د ساتنې ترڅنګ یې د دواړو ولسونو د سوکالۍ لپاره د اړیکو او مشورو د کچې پر لوړولو ټینګار وکړ
سیاسي او دفاعي شنونکي وایي، دا اړیکه په داسې وخت کې شوې چې سیمه له مهمو نړیوالو بدلونونو تېرېږي. د دوی په خبره، د دواړو ګاونډیو هېوادونو ترمنځ د باور او همکارۍ دا څرګندونه د سیمې د ثبات لپاره یو مثبت ګام بلل کېږي او ښيي چې پاکستان او ایران غواړي په ګډه له ننګونو سره مقابله وکړي او د خپلو خلکو سوکالي تضمین کړي