په ایران کې د روانو مظاهرو او د امریکا د ممکنه پوځي مداخلې د اټکلونو تر څنګ، د ایران پارلمان یوه فوقالعاده غونډه راوبلله تر څو د ملي امنیت وضعیت او د بهرنیو ګواښونو پر وړاندې د احتمالي غبرګونونو ارزونه وکړي
د پارلمان غړو ته په وینا کې د ایران د پارلمان رئیس محمد باقر قالیباف خبرداری ورکړ چې که امریکا پر ایران برید وکړي، نو تهران به پرېکنده ځواب ورکړي.
هغه وویل چې د ایران غبرګون به په یوه جبهه محدود نه وي او که اړتیا وي، اسرائیل او په سیمه کې د امریکا پوځي اډې هم په نښه کېدای شي
قالیباف ادعا وکړه چې په ایران کې وروستي ګډوډۍ له بهره هڅول کېږي او امریکا او اسرائیل یې د سیاسي فشار، بندیزونو او پټو اقداماتو له لارې د بېثباتۍ په رامنځته کولو تورن کړل.
هغه وویل ,,ایران به هېڅکله په خپلو کورنیو چارو کې بهرنی لاسوهنه ونه زغمي ،، او زیاته یې کړه چې تهران په هر حالت کې د خپل حاکمیت د دفاع لپاره چمتو دی.
دغه بیړنۍ پارلماني غونډه په داسې مهال شوې چې په منځني ختیځ کې ترینګلتیاوې لوړې کچې ته رسېدلې دي، ډیپلوماټیکې هڅې ټکنۍ دي، پر ایران بندیزونه دوام لري او په ټوله سیمه کې پوځي فعالیتونه زیات شوي دي. ایراني چارواکو په ځلونو خبرداری ورکړی چې پرلهپسې فشار ښايي وضعیت د نېغ په نېغه ټکر پر لور یوسي.
بل لور ته، د اسرائیلي رسنیو د راپورونو له مخې، اسرائیل د احتمالي کړکېچ په تمه خپل پوځي او امنیتي جوړښتونه لوړې تیارسۍ ته رسولي دي. د دغو راپورونو له مخې، د اسرائیلو دفاعي چارواکي په ایران کې روانو پرمختګونو او د سیمې د متحدینو له خوا د احتمالي غچ اخیستونکو بریدونو احتمال له نږدې څاري.
د امنیتي چارو شنونکي وایي چې د امریکا او ایران ترمنځ هر ډول مستقیم ټکر ښايي ډېر ژر له دوه اړخیزې شخړې واوړي او سیمهییز لوبغاړي هم ورښکېل کړي، چې دا به د مهمو سمندري لارو، د انرژۍ بنسټیزو تأسیساتو او ملکي وګړو لپاره جدي ګواښونه رامنځته کړي
د فارس خلیج او شاوخوا سیمو کې د امریکا ګڼې پوځي اډې شته، چې د تاوتریخوالي په صورت کې د احتمالي نښتو مرکزونه کېدای شي.
نړیوال څارونکي د زغم او احتیاط غوښتنه کوي او خبرداری ورکوي چې نورې ترینګلتیاوې ښايي له مخکې نه ناآرامه سیمه لا بېثباته کړي. ډیپلوماټیکې سرچینې وایي چې د ناسمو محاسبو د مخنیوي لپاره ښايي لا هم پټې اړیکې روانې وي، خو په ښکاره توګه د ټولو اړخونو توند دریځونه ورځ تر بلې زیاتېږي. په داسې حال کې چې د ایران په ځینو سیمو کې مظاهرې روانې دي او د سیمې پوځونه لوی تیارۍ نیولي دي ، وضعیت لا هم نازک دی او د کړکېچ د زیاتېدو یا کمېدو پرېکړه به په راتلونکو ورځو کې د واشنګټن، تهران او د هغوی د سیمهییزو متحدینو پر پریکړو ولاړه وي