بنو : د بنو ولسوالۍ د ډومېل تحصیل پخوانی ناظم، فدا محمد خان وزیر، د سه شنبې په ورځ هغه مهال ټپي شو چې د ډومېل بازار په سیمه کې د هغه د دفتر مخې ته بمي چاودنه وشوه.
د بنو د پولیسو ویاند آصف حسن پاکستانی میډیا ته تایید کړی چی د فدا محمد خان وزیر د دفتر د مرکزي دروازې سره نږدې ایښودی شوی ایی ای دی بم وچاودېدو.
د چاودنې وروسته سمدستي د پولیسو درنه نفري سیمې ته ورسېده، سیمه یې کلابنده کړه او رسمي پلټنې یې پیل کړې.
د پولیسو او ځايي سرچینو په وینا، د چاودنې پر مهال فدا محمد خان وزیر په خپل موټر کې ناست و او لږ ټپي شو. په چاودنه کې د هغه موټر بشپړ ویجاړ شو، په داسې حال کې چې د دفتر دروازه او شاوخوا ودانۍ هم زیانمنې شوې دي.
فدا محمد خان وزیر د ترهګرۍ پر ضد د سولې په هڅو کې د خپل فعال رول له امله پېژندل کېږي او د سیمې د امن د ټینګښت لپاره یې د قبایلي لښکرو مشري هم کړې ده. ټاکل شوې وه چې هماغه ورځ د قبایلي مشرانو یوه مهمه غونډه د هغه په دفتر کې ترسره شي، او نوموړی د هماغې غونډې ته پر لاره و چې دا پېښه رامنځته شوه.
د پېښې وروسته، قبایلي مشران د چاودنې ځای ته راووته او د سخت احتجاج او کلک غبرګون اعلان یې وکړ. راپورونه وایي چې د بنو ـ کوهاټ پر سړک وسله وال کسان هم لیدل شوي، چې له امله یې امنیتي اندېښنې زیاتې شوې دي. د پولیسو چارواکو ویلي چې وضعیت له نږدې څارل کېږي.
دا برید په داسې حال کې شوی چې په بنو او شاوخوا سیمو کې د تشدد پېښې زیاتې شوې دي. یوه ورځ مخکې، د هاتی خېل قبیلې یو سړی او د هغه زوی د ډومېل په سیمه کې د مشکوکو وسله والو له خوا د تښتول کېدو راپور ورکړل شوی و.
همدارنګه د یکشنبې په ورځ د بنو د کشفي خېل په سیمه کې یو پولیس کانسټېبل په ډزو کې ووژل شو، په داسې حال کې چې په همدې ورځ د لکي مروت د سرای نورنګ په سیمه کې درې د ټرافیک پولیس اهلکاران هم په یو بل برید کې ووژل شوی وو.
له دې وړاندې، د دسمبر پر دوهمه، د میرعلي اسسټنټ کمشنر شاه ولي او دوه پولیس سرتېري د بنو په یوه برید کې د څلورو وژل شویو کسانو له ډلې وو، کله چې د چارواکي موټر تر برید لاندې راغی. سره له دې چې د وسلوالو مرګ ژوبله زیاته شوې، خو پاکستان په ۲۰۲۵ کال کې د وسلوال تاوتریخوالي په پېښو کې د پام وړ زیاتوالی ولید، چې له مخې یې ترهګریز بریدونه ۳۴ سلنه او د ترهګرۍ اړوند مرګ ژوبله ۲۱ سلنه زیاته شوې ده. سرکاري شمېرو له مخې، په ټول هېواد کې د کال پر مهال ۶۹۹ ترهګریز بریدونه ثبت شوي دي