پېښور: د خيبرپښتونخوا د قدرتي افتونو د مدیریت او سمبالښت ادارې پی ډی ایم ای په صوبه کې د باران وړاند وینه کړی او ویلی ی دی چې د دسمبر له ۳۰ نیټی څخه تر جنورۍ ۱ پورې به د صوبې په زياترو ضلعو کې د تندر او برېښنا سره باران وشي او په غرني سيمو کې به واوره ووریږی
د پي ډي اېم اې د رپورټ ترمخه د خراب موسمي وضعې له امله د صوبایی ايمرجنسي آپرېشن سنټر له خوا ټولو اړوندو ضلعي انتظاميو او ادارو ته د اقداماتو لپاره الرټ جاري شوی دې
پي ډي اېم اې وايي چې چترال، دير، سوات، شانګله، کوهستان، کولايي پالاس، مالاکنډ، بونير، مانسهره، بټګرام، تورغر، ايبټ آباد، هري پور، کرم، خيبر، باجوړ او مومند ضلعو کې به د ټاکل شوې مودې پر مهال په وقفو سره باران او د تندر غورځیدلو امکان وي
د ادارې په وينا، په صوابۍ، مردان، نوشهره، پېښور، چارسده، کوهاټ، هنګو، اورکزۍ، کرک، بنو، لکي مروت، ټانک، ډېره اسماعيل خان او شمالي او جنوبي وزيرستان کې هم د باران اټکل شوی دی
پي ډي اېم اې خبرداری ورکړی چې د واورې ورېدو له امله به په ناران، کاغان، دير، سوات، مالاکنډ، کوهستان، مانسهره، ايبټ آباد، شانګله او ګليات سيمو کې د سخت باران له امله سړکونه بندېدای شی او غر ښوویندنې پیښې هم مخې ته راتللې شي
ادارې دا هم ويلي چې په غرنۍ سيمو کې د ځمکې ښويېدو لينډ سلايډنګ او د واورينو ښوېدنو خطرهم شته. اړوندو ادارو ته لارښوونه شوې چې د اوبو د ايستلو نظام فعال وساتي، د سړک غاړې بيل بورډونه خوندي کړي او د سيندونو، خوړونو او برساتي نالو دوامداره څارنه وکړي
پي ډي اېم اې له سيلانيانو او مسافرو غوښتنه کړې چې د واورې ورېدو پر مهال کافي اندازه اوبه، خوراکي توکي، درمل او ګرم کالي له ځان سره وساتي. همدارنګه، عامو خلکو ته سپارښتنه شوې چې د تيزو بادونو او تندر پر مهال د برېښنا له ستنو، اعلانې تختو او کمزورو ودانيو څخه ځان لرې وساتي
د پي ډي اېم اې وياند وويل چې د صوبایی ايمرجنسي آپرېشن سنټر ۲۴ ساعته فعال دی او خلک کولی شي د هر ډول مرستې او معلوماتو لپاره له ویړیا اړیکې لارې هيلپ لاين 1700 سره اړيکه ونيسي
