د لېبیا د د پوځ مشر محمد علي احمد الحدّاد د ترکیې د پلازمېنې انقره ته نږدې د الوتکې په یوه خواشینوونکې پېښه کې ژوند له لاسه ورکړې
پېښه هغه مهال رامنځته شوه چې الوتکه د اسنبوغا نړیوال هوايي ډګر څخه تر پورته کېدو لږه شېبه وروسته د تخنیکي خرابۍ له امله ولوېده او په بشپړه توګه ویجاړه شوه
د ترکي چارواکو په وینا، دا پېښه د سې شنبې په ماښام رامنځته شوې چې پکې ټول اته کسان وژل شوي دي. د ترکي رسنیو د راپورونو له مخې، په وژل شویو کې د لېبیا څلور لوړپوړي پوځي افسران، د پوځ د لوی درستیز یو سلاکار، د لوی درستیز له دفتر سره تړلی یو انځور اخیستونکی (فټوګرافر) او د الوتکې درې کسیزه عمله شامله ده
لومړې پلټنې
ترکي چارواکي وايي چې د لومړنیو پلټنو له مخې د تخریب یا ترهګریز اقدام هېڅ نښې نه دي موندل شوي. د معلوماتو له مخې، د الوتنې پر مهال د الوتکې د برېښنايي سیستم د خرابۍ راپور ورکړل شوی و او د بېړنۍ ناستې غوښتنه شوې وه، خو تر هغې وروسته له الوتکې سره اړیکه پرې شوې ده
د لېبیا لومړي وزیر عبدالحمید الدبیبه د محمد علي احمد الحدّاد مړینه تایید کړې او ژوره خواشیني یې څرګنده کړې ده. نوموړي وویل چې لېبیا له داسې یوه لوړپوړي پوځي مشر څخه بېبرخې شو چې په نظم، مسلکي صداقت او ملي ژمنتیا سره یې هېواد ته خدمت کړی و.
د هغه په وینا، وژل شوو افسرانو د ملي امنیت او بنسټیز ثبات لپاره مهم رول ادا کړی و
په دې پېښه کې وژل شوي نور لېبیایي پوځي چارواکي جنرال الفیتوري غریبیل (د ځمکنیو ځواکونو لوی درستیز)، بریګېډیر جنرال محمود القطاوي (د پوځي تولیداتو ادارې مشر)، محمد العساوي دیاب (د پوځ د لوی درستیز سلاکار) او محمد عمر احمد محجوب دي. د الوتکې درې واړه د عملې اهلکار هم په پېښه کې وژل شوي
درې ورځنی ملي ماتم
د ملګرو ملتونو له لوري په رسمیت پېژندل شوې د لېبیا د ملي یووالي حکومت د دې پېښې له امله د درې ورځني رسمي ماتم اعلان کړی دی. د ماتم پر مهال به پر ټولو دولتي ودانیو ملي بیرغونه نیم ځوړند وي او ټولې دولتي مراسم او جشنونه به لغوه و.
لېبیایي پوځي پلاوی د ترکیې په سفر کې و، چې په انقره کې د لوړې کچې دفاعي خبرو اترو لپاره تابیا شوې غونډه کې ګډون وکړي، د دغو خبرو موخه د لېبیا او ترکیې ترمنځ د پوځي همکاریو پراخول وو.
له پېښې وړاندې محمد علي احمد الحدّاد او د هغه پلاوي د ترکیې د دفاع وزیر یشار ګولر او نورو لوړپوړو پوځي چارواکو سره لیدنې کړې وې
محمد علي احمد الحدّاد د ۲۰۲۰ کال د اګست په میاشت کې د ملګرو ملتونو له لوري په رسمیت پېژندل شوې د لېبیا حکومت له خوا د لوی درستیز په توګه ټاکل شوی و.
هغه د لېبیا د وېشل شویو پوځي بنسټونو د یووالي لپاره د ملګرو ملتونو تر څار لاندې هڅو کې یو مهم او اغېزناک رول لوبولی و
د ترکیې حکومت پلټنې
د ترکیې د عدلیې وزارت د الوتکې د پېښې رسمي پلټنې پیل کړې دي، او د ژغورنې ډلې د انقرې ته نږدې د پېښې ځای ته رسېدلې دي. ترکي چارواکي وايي چې د پلټنو تر بشپړېدو وروسته به د پېښې د لاملونو په اړه تفصیلي راپور خپور شي