د ایران ولسمشر مسعود پزشکیان یو ځل بیا د افغانستان سره د اړیکو د ښه کولو پر ژمنې ټینګار کړی او ویلي یې دي چې تهران به په ځانګړي ډول د ګډو سرحدي سیمو په کچه، د دواړو هېوادونو ترمنځ د اړیکو د پیاوړتیا لپاره خپلې هڅې روانې وساتي
ایراني رسنیو د ولسمشر له قوله ویلي، چې نوموړي دا څرګندونې د جنوبي خراسان ولایت د سفر پر مهال کړې دي؛ هغه ولایت چې له افغانستان سره ګډه پوله لري
ولسمشر پزشکیان د دغه ولایت له والي غوښتي چې د ایران او افغانستان ترمنځ د دوه اړخیزو اړیکو د پراختیا لپاره عملي ګامونه پورته کړي
د ولسمشر دغه څرګندونې په داسې مهال کړی چې افغانستان هڅه کوي خپلې سیمهییزې او سوداګریزې لارې زیاتی کړي ، په ځانګړي ډول د پاکستان سره د سوداګرۍ د ځنډ او د پولو د تړل کېدو له امله د دواړو هېوادونو تجارت اودریدلی په همدې لړ کې، په وروستیو میاشتو کې افغان چارواکو ایران او هند ته پرلهپسې سفرونه کړي دي
روانه میاشت د افغانستان د روغتیا مرستیال وزیر او د بهرنیو چارو وزارت لوړپوړو چارواکو تهران ته سفر وکړ، چېرته چې د درملو، خوړو، سوداګرۍ او تخنیکي همکاریو پر پراخولو خبرې وشوې.
په همدې موده کې، افغان پلاوو نوي ډهلي ته هم سفرونه وکړل او هلته یې د روغتیا، تعلیم او سوداګرۍ په برخو کې پر همکاریو بحث وکړ
ایران د ۲۰۲۵ کال د نومبر په میاشت کې په تهران کې د افغانستان په اړه د پرمختګونو په تړاو یوه مهمه سیمهییزه کنفرانس هم کوربهتوب وکړ. په دغه غونډه کې د پاکستان، چین، روسیې او د منځنۍ اسیا د هېوادونو ځانګړو استازو ګډون کړی و، خو افغانستان په دې مهمه غونډه کې ګډون و نه کړو ،بیا روسته د افغانستان ګډون نه کولو په اړه پوښتنې هم را ولاړې شوې
په کانفرنس کې د افغانستان د امنیت وضعیت، د ترهګرۍ ګواښونه، د مخدره توکو قاچاق، بشري مرستې او سیمهییز اقتصادي ادغام په اړه هر اړخیز بحث وشو. که څه هم د طالبانو حکومت په غونډه کې ګډون نه و کړی، خو ګډونوالو د افغانستان د ثبات، امنیت او د اقتصاد د بیا رغونې لپاره د سیمهییزې همکارۍ پر اړتیا ټینګار وکړ
د کانفرنس وروسته، د ایران پخواني ځانګړي استازي او د افغانستان د چارو په برخه کې د ایران لوړپوړي ډیپلوماټ محمد رضا بهرامي په کابل کې د افغانستان د بهرنیو چارو له وزیر مولوي امیر خان متقي سره ولیدل. بهرامي نوموړي ته د تهران د غونډې تفصیلات وړاندې کړل او د افغانستان په اړه یې د ګاونډیو هېوادونو دریځونه او وړاندیزونه شریک کړل.
د لیدنې پر مهال، بهرامي مولوي امیر خان متقي ته ایران ته د سفر بلنه هم ورکړه او د دواړو هېوادونو ترمنځ یې د اړیکو مثبت پرمختګ، سرحدي همکاري، د امنیت ښه والی او د حکومتولۍ په برخه کې نسبي ثبات یاد کړ. شنونکي وایي، د ایران د ولسمشر وروستۍ څرګندونې او فعالې ډیپلوماتیکې هڅې ښيي چې تهران افغانستان ته د یو مهم ګاونډي او سیمهییز شریک په سترګه ګوري، په ځانګړي ډول په داسې وخت کې چې کابل هڅه کوي خپلې اقتصادي او سوداګریزې لارې لا پراخې کړي
نورخبرونه: تهران غونډه کې د افغانستان ګډون نه کول: سیمه ایزو هیوادونو په دې اړه پوښتنې را ولاړې کړي
د افغان طالبانو ضد: طالب چارواکو په تهران کې د علاقایی استازو په غونډه کی د ناستې څخه انکار کړی