کابل : د طالبانو سرچینو نن جمعی په ورځ افغانستان انټرنشنل پښتو ته ویلي، چې په تېره یوه میاشت کې د طالبانو مشر ملا هبت الله د کورنیو چارو وزیر سراج الدین حقاني ته نږدې کسان په مهمو دولتي څوکیو ګمارلي دي
د طالبانو مشر ملا هبت الله په یوه تازه حکم کې محمد وزیر بادشاه د کورنیو چارو وزارت د معاون په توګه ټاکلی دی. نوموړی د حقاني شبکې له ډېر بااعتماده او بانفوذه کسانو څخه شمېرل کېږي
په همدې حکم کې د طالبانو د کورنیو چارو وزارت مرستیال عبدالله مختار د خوست ولایت د طالبانو والي په توګه ټاکل شوی دی. سرچینې وایي، مختار هم د سراج الدین حقاني نږدې تن بلل کېږي
همدارنګه، د کورنیو چارو وزارت بل مرستیال محمد نبي عمري ورور، حافظ عبدالرشید عمري، د خوست ښاروال په توګه ټاکل شوی، چې مخکې د غزني د والي مرستیال په توګه دنده ترسره کړې ده
سرچینې زیاتوي، چې د حقاني شبکې مخکښ غړی حافظ بلال د زندانونو چارو د سمون ادارې د تخنیکي او مسلکي پالیسۍ معین په توګه ټاکل شوی دی
باخبره سرچینې وايي، ملا هبت الله هڅه کوي چې په خوست کې د حقاني شبکې واک محدود کړي، خو اوس یو ځل بیا د سراج الدین حقاني نږدې کسان په دې ولایت کې مهمې دندې ترلاسه کړې دي
خوست د سراج الدین حقاني د نفوذ مرکز ګڼل کېږي، او حقاني شبکه هڅه کوي چې په خپل ولایت کې بشپړ کنټرول وساتي
حقاني شبکه د طالبانو د کورنیو چارو وزارت تر ټولو نفوذ لرونکې ډلې څخه شمېرل کېږي، چې په ځانګړي ډول په خوست او نورو جنوبي ولایتونو کې ځواکمن حضور لري. د ملا هبت الله وروستي ګمارنې ښيي چې د شبکې داخلي ځواکونه او د ولایت واک ترمنځ کړکېچونه دوام لري
نورخبرونه: افغان طالبان خپلې ژمنې ماتوي: د پاکستان دفاع وزیر