وانا کیډټ کالج برید: ټول ترهګر له منځه وړل شوي

 پیښور: د امنیتي سرچینو د معلوماتو له مخې، په وانا کیډټ کالج برید کوونکي پنځه تنه وو، چې یو یې ځانمرګی برید وکړ او څلور نور د امنیتي ځواکونو په بریالي عملیاتو کې له منځه یووړل شول

امنیتي چارواکي وايي چې دا مهال د کالج ودانۍ د ماینونو د شک له امله پاکېږي او د عملیاتو پر مهال د کالج هېڅ زده‌کوونکي یا ښوونکي ته زیان نه دی رسېدلی

امنیتي چارواکو زیاته کړه چې د برید پر مهال نږدې ۶۵۰ کسان په کالج کې موجود وو، چې له هغې ډلې ۵۲۵ تنه کیډټان وو. ټول زده‌کوونکي او استاذان په خوندي ډول ژغورل شوي دي او له کالج څخه خوندي ځایونو ته رسول شوي دي

امنیتي سرچینې وايي چې په وانا کیډټ کالج کې د ترهګریز برید پر مهال د ترهګرو له منځه وړلو لپاره د عملیاتو پر مهال ډېر احتیاط او دقیق پلان عملي شو، څو د زده‌کوونکو او استاذانو ژوند خوندي پاتې شي او دوی ته کوم زیان و نه رسیږي

لومړې څیړنې ښایی چې  د برید کوونکو تړاو له افغانستان سره ښودل شوی او هغوی ته د برید پر مهال د افغانستان له خاورې د ټیلیفون له لارې لارښوونې کېدلې. دا خوارج د کالج د یوه ودانۍ په دننه کې پټ شوي وو چې د کیډټانو له استوګنځي لرې وه

تېره ورځ برید کوونکو د کالج د لوی دروازې سره له چاودېدونکو توکو ډک موټر وجنګاوه، چې له امله یې د کالج دروازه ونړېده او نږدې ودانیو ته هم زیان ورسېد.

په اوس وخت کې د بم شنډوونکو ټیمونه د کالج ساحه د بشپړې پاکۍ لپاره پلټنې کوي، څو د بارودي سرنګونو هر ډول خطر له منځه یووړل شي.

د امنیتي ځواکونو دریځ
امنیتي ادارو د پېښې تر شا د افغان خوارجو لاس لرل تایید کړي او ویلي یې دي چې دا ډول بریدونه د پاکستان د ثبات او زده‌کوونکو د ژوند د ورانولو هڅې دي، خو دا هڅې به ناکامه شي

مهمه ده چې یادونه وشی چې پرون په اسلام آباد جوډیشل کمپلیکس هم یو خونړې ځانمرګي برید ترسره شو چې په پایله کې ی ۱۲ کسان شهیدان شول ، د یاد برید ذمه واري له ټي ټي پي څخه جلا شوې یو ترهګرې ډلې جماعت الاحرار په خپله غاړه واخستله

نورخبرونه: نړیوالو هیوادونو اسلام اباد او وانا کیډټ کالج ځانمرګي بریدونه غندلې