پاکستان د افغان طالبانو د وياند ذبيح الله مجاهد وروستي څرګندونې ګمراه کوونکي بللي او ويلي يې دي چې د کابل له لوري وړاندې شوی دريځ له حقايقو سره سمون نه لري
د پاکستان رسمي غبرګون
د اسلاماباد چارواکو په څرګند ډول ويلي چې د پاکستان دريځ تل يو شان او اصولي پاتې شوی ،پاکستان ورته په ډاګه کړې چې د افغانستان خاوره بايد د پاکستان پر ضد د هيڅ ډول فعاليت لپاره و نه کارول شي
د افغان وياند څرګندونې او شاليد
د اسلامي امارت وياند ذبيح الله مجاهد څو ورځې وړاندې په يوه مرکه کې ادعا کړې وه چې د استنبول مذاکراتو پر مهال افغان لوري پاکستان ته وړانديز وکړ چې هغه کسان چې اسلاماباد يې امنيت ته خطر بولي، د هغوی د شړلو (ډيپورټ کولو) لپاره تيار دي، خو پاکستان دا وړانديز ونه مانه۔
د ده په وينا، پاکستان ويل چې دا کسان دې د افغانستان دننه کنټرول شي۔
مجاهد زياته کړه چې د اسلامي امارت پاليسي واپس راستانه شوي کډوالو ته د وسلو د ساتلو اجازه نه ورکوي، او که پاکستان د کوم شخص په اړه باوري معلومات وړاندې کړي، نو پرضد به يې اقدام وشي
ده دا متنازع ادعا هم وکړه چې د پاکستان وروستۍ کړنې ښيي ګنې اسلاماباد غواړي د امريکا د بېرته راتګ لپاره د بګرام هوايي اډې چاپېريال مناسب ساز کړي۔
د پاکستان دريځ
پاکستان د دې ټولو دعوو رد کړی او ويلي يې دي چې د مذاکراتو پر مهال اسلاماباد واضح وويل چې هغه کسان چې د افغانستان په خاوره کې د پاکستان امنيت ته مستقيم خطر ګڼل کېږي، بايد ونيول شي، کنټرول شي يا د قانون منګولو ته وسپارل شي
چارواکو وويل، کله چې افغان لوري وويل چې ځينې له دغو کسانو څخه د پاکستان اتباع دي، نو اسلاماباد سمدلاسه وړانديز وکړ چې دا کسان دې د ټاکلو سرحدي لارو له لارې پاکستان ته وسپارل شي ، دا وړانديز نه يوازې د پاکستان د پخوانۍ پاليسۍ سره سم و، بلکې له نړيوالو اصولو سره هم مطابقت لري
د افغان دعوو ردول
پاکستاني چارواکو وويل، د افغان وياند دا ادعا چې ګويا پاکستان د “ډيپورټ کولو وړانديز” رد کړی، سراسر غلط تاثر دی۔ د اسلاماباد دريځ تل د امنيتي تصديق او قانوني طريقې پر بنسټ ولاړ دی۔
اسلاماباد زياته کړه چې د هر ممکن خطر د مخنيوي لپاره عملي همکاري او واقعي اقدامات اړين دي، نه دا چې يو بل باندې تورونه ولګول شي او بيانونه ورکړل شي
د امريکا اړوند ادعا
پاکستان د ذبيح الله مجاهد دا ادعا هم بې بنسټه وبلله چې ګويا پاکستان غواړي د امريکايي ځواکونو د بېرته راتګ لپاره زمينه برابره کړي۔
چارواکي وايي دا تور بېدليل، بېبنسټه او له واقعيت څخه لرې دی۔ پاکستان د هېڅ بهرني پوځي شتون پلوي نه دی، او د سيمې د سولې، ثبات او حاکميت پر اصولو باور لري
د دوه اړخيز ميکانيزم ژمنه
پاکستان يو ځل بيا ټينګار وکړ چې غواړي د افغانستان سره موجود دوه اړخيز ميکانيزم ، په ځانګړي ډول د استنبول مذاکراتو چوکاټ لا اغېزمن کړي، څو د سرحدي نظم، امنيت او ګډه همکاري باوري شي. پاکستان وويل چې له افغانستان سره اړيکې بايد د متقابل احترام او همکارۍپر بنسټ ولاړې وي، او هغه څرګندونې چې له حقايقو سره سمون نه لري، نه يوازې د خبرو اترو بهير زيانمنوي، بلکې د سيمې د امن ثبات ته هم تاوان رسوي
نورخبرونه
پاکستان له خپله ځانه ډیر غټ هیواد هند ته ماتې ورکړې ده: عطا تارړ، د اطلاعاتو وفاقي وزیر
پاکستان کې د هند استخباراتي ادارو لوري ترهګریز فعالیتونه او پلانونه بربنډ شول
