خيبر پښتونخوا: د هنګو په بليامينه سيمه کې يو پر بل پسې دوه زورورې چاودنې شوې دي، چې له امله يې د پوليس يو لوړپوړی افسر او درې نور پوليس سرتېري شهيدان شوي دي۔
د معلوماتو له مخې، لومړۍ چاودنه د بليامينه د پوليس تاڼې ترڅنګ رامنځته شوه۔ له دې پېښې وروسته د هنګو د پوليسو د عملياتو مشر ایس پي اسد زبېر د پېښې د پلټنې لپاره ځای ته ورسېد۔
د ځایی سرچینو ترمخه چې کله ایس پی زبیر د پیښې ځای ته ورسیدو نو دویمه زوروره چاودنه وشوه، چې په پايله کې ایس پي اسد زبېر، د هغه محافظ داوود او چلوونکی عاطف شهيدان شول۔ دوه نور پوليس په دې چاودنه کې ټپيان شول چې درملنې لپاره د هنګو ضلعي روغتون ته انتقال شوي دي۔
د پېښې وروسته امنيتي ځواکونو ټوله سيمه کلابنده کړې او د پلټنو لړۍ يې پيل کړې ده۔ د بم شنډولو ځانګړې ډله بي ډي ایس هم د پیښې ځای ته رسېدلې، څو د چاودنو له ځایه شواهد راټول کړي او د استعمال شوي موادو او احتمالي بريدګرو په اړه څېړنه وکړي۔
نورخبرونه