په پاک افغان پوله تورخم نن د نهې په ورځ یوه مهمه غونډه ترسره شوه، غونډه په تورخم بارډر تجارتي ټرمینل کې د خیبر رائفلز قوماندان په مشرۍ یوه مهمه تابیا شوې وه.
په دې غونډه کې د باچامینې کلي مشران، د ټرانسپورټ اتحادیې او د لیبر اتحادیې مشران، او همدارنګه د کسټم کلیرنګ ایجنټان ګډون وکړ.
د غونډې پر مهال د بارډر ټرمینل ښه او اغېزمن فعالیت، د ولسي اسانتیاوو برابرول او موجودو ستونزو په اړه ګټورې خبرې وشو. سیمه ییزو مشرانو او د اتحادیو استازو خپلې ستونزې او وړاندیزونه وړاندې کړل او ټینګار یې وکړ چې په پوله کې سوداګریز فعالیتونه باید لا منظم او اسان شي.
د خیبر رائفلز ځواک کمانډر د مشرانو ونډه وستایله او ویې ویل چې د ولسي شراکت او وړاندیزونو په مرسته د بارډر ټرمینل فعالیت ښه کېدلی شي. هغه ډاډ ورکړ چې د ولسي اسانتیاوو او سوداګریزو چارو د لا پرمختګ لپاره به ټول اړین ګامونه پورته شي. دلته باید یادونه وشی چې په تورخم پوله د پاکستان او افغانستان سوداګر د یو شمیر ستونزو سره مخ دي او دوی غوښتنې کوي چې ددوی ستونزې دې په ځانګړي توګه هوارې شي. په پوله سوداګر وایی چې د چټګ انټرنییټ د نشتوالي له امله دوی یو شمیر ستونزو سره مخ دي، دوی غوښتنه وکړه چې په پوله دې چټک انټرنیټ فعال شي څو سوداګر خپل کاروبار ته وده ورکړي .
دا هم مهمه ده او باید چې یادونه وشي چې په دې وروستیو کې د چارواکو د معلوماتو ترمخه د پاکستان او افغانستان دوه اړخیز تجارت وده کړې ده .
نورخبرونه
قبایلي اولس لپاره د خوښۍ خبر: انګور اډه دوه کاله وروسته پرانستل شو