اسلام آباد: د خېبرپښتونخوا د حکومت د اطلاعاتو سلاکار بیرسټر ډاکټر سیف په اسلاماباد کې د افغانستان له سفیر سردار احمد شکیب سره وکتل
په دې لیدنه کې د دواړو لورو ترمنځ د ګډو ګټو پر موضوعاتو خبرې وشوې او د پاکستان او افغانستان د امنیتي وضعیت په اړه تفصیلي تبادله نظر ترسره شو. د خېبرپښتونخوا په بېلابېلو سیمو کې د روانې ناامنۍ پېښو په اړه هم مفصلې خبرې وشوې.
بیرسټر ډاکټر سیف د وزیراعلی علي امین ګنډاپور په مشرۍ کې د خېبرپښتونخوا حکومت د سولې او امنیت د هڅو په اړه افغان سفیر ته معلومات ورکړل او ټینګار یې وکړ چې د سیمې د دایمي سولې لپاره دواړو هېوادونو ګډ همکاري اړینه ده.
هغه وویل چې د پاکستان او افغانستان سوله یو له بل سره تړلې ده او اړینه ده چې دوه اړخیزې اړیکې لا پسې پیاوړې شي. په غونډه کې د سیمې د سولې او پرمختګ لپاره پر ګډو هڅو اتفاق وشو.
بیرسټر ډاکټر سیف د قبایلي جرګو پر ارزښت هم ټینګار وکړ او ویې ویل چې قبایلي جرګې د سولې په ټینګښت کې مهم رول لوبولی شي. نوموړي زیاته کړه چې وزیراعلی علي امین ګنډاپور پخپله د قبایلي جرګو مشري کړې ده.
هغه وویل د افغانستان او خېبرپښتونخوا خلک د تاریخي، کلتوري او مذهبي اړیکو له لارې یو بل سره تړلي دي، او د خلکو ترمنځ د اړیکو زیاتوالی د سیمې په سولې کې مرسته کولی شي
افغان سفیرلوري د بشپړه ډاډ ژمنه
په دې لیدنه کې افغان سفیر سردار احمد شکیب د سوداګریزو اړیکو د پیاوړتیا پر اړتیا ټینګار وکړ او ډاډ یې ورکړ چې د افغان حکومت له لوري د سولې د ټینګښت لپاره هر ډول همکاري ته چمتو دي. هغه زیاته کړه چې دایمي او پایداره سوله د دواړو هېوادونو په ګډو ګټو کې ده. په پای کې بیرسټر ډاکټر سیف د افغان ولس سره د همدردۍ څرګندونه وکړه، د وروستي زلزلې له اغېزمنو شویو کورنیو سره د مرستې ډاډ یې ورکړ او د هغوی لپاره دعا وشوه.
نورخبرونه
خیبر پښتونخوا له ترهګرۍ څخه بده اغیزمنه شوې په لومړۍ کرښه کې صوبه ده: بیرسټر سیف