د پاکستان په درې ورځنې دوره راغلي د چين خارجه وزير وانګ اي د پاکستاني چارواکو سره ملاقاتونه کولو وروستو خپل هيواد ته واپس تلې دے ۔ د دورې په مهال وانګ اي پاک ۔ چين وزرائے خارجه شپږم سټريټجک ډائيلاک کښې شرکت کړي وو او د خپل هم منصب اسحاق ډار سره ئې په شريکه د دې اجلاس صدارت کړي وو ۔ پاکستاني سياسي قيادت سره د ملاقاتونو لومړي مرحله کښې وانګ اي د وزيراعظم شهباز شريف سره ليده کاته کړي وو او ورسره ئې دوه اړخيزه اړيکو پراختيا،تجارت،سرمايه کارۍ سي پيک بشمول نورو شعبو کښې همکارۍ پراخه کولو او د سيمې په صورتحال خبري کړې وې ۔ ملاقات په مهال وزيراعظم شهباز شريف په سي پيک فيز ټو منصوبې په پرمختګ د اطمينان اظهار کړېدے او وئيلي ئي دي چې چين سره تجارت،سرمايه کارۍ،کرکيله،معدنيات،مائيننګ او د ائي سي ټي بشمول نورو شعبو کښې تعاون مضبوطول غواړؤ ۔ وزيراعظم د پاکستان خپلواکۍ او د سيمې استحکام په حواله پاکستان سره د چين د مرستو ستائينه کړې او د چين د حکومت شکريه ئې ادا کړيده ۔ وانګ اي په دې موقع ووئيل چې پاکستان خپل باورې شراکت دار ملګرې ګڼو، د دواړو ملکونو تعلقات لکه د اوسپنې د ديوال مضبوط دي او وخت تيريدو سره دوه اړخيزه اړيکي وده مومي ۔ وانګ اي زياته کړه چې د سيمې د امن او څوکالۍ لپاره به چين د پاکستان سره په شريکه کوششونه جاري ساتي ۔
هيڅ قوت د پاکستان او چين ملګرتيا نشي ختمولې،صدر زرداري
د چين خارجه وزير ايوان صدر ته هم ورغلې او د صدر مملکت آصف علي زرداري سره ئې ملاقات کړېدے ۔ صدر زرداري د چين د خارجه وزيروانګ اي د دورې او اسلام آباد ته د هغه د راتګ هرکلي کړېدے او وئيلي ئي دي چې دا دوره به د دواړؤ ملکونو ترمينځ د اوږدو مودو راهسې قائم د ملګرتيا او ورورلۍ رشته نوره هم مضبوطه کړي ۔ صدر زرداري سي پيک د چين د صدر شي جن پنګ د “بيلټ اينډ روډ انيشيټو” مهمه برخه ګرځولي ده او وئيلي ئي دي چې دې منصوبه د دواړو ملکونو ترمينځ سټريټجکي تعاون،سيمه ايز رابطې او د اقتصادي پرمختګ خوب په حقيقت کښې بدل کړېدے ۔ د چين خارجه وزير د پاکستان دوره ګټه ور ګرځولي او وئيلي ئي دي چې د دواړو ملکونو ملګرتيا د نسلونو راهسې قائم ده کومه چې په اعتماد او جامع سټريټجک شراکت دارۍ باندې مشتمل ده او چېن په دې ملګرتيا وياړ کوي،وانګ اي اسلام آباد ته په راتګ او د چين د وفد ميلمستيا کولو باندې د پاکستان د حکومت شکريه ادا کړيده او وئيلي ئي دي چې د رابطو او ملاقاتونو دا سلسله به هم دغه شان دوامداره وي او بيجنګ ته د پاکستاني مشرانو د راتګ په طمع يو۔ د پيپلزپارټۍ چيئرمين بلاول بهټو زرداري او وفاقي وزيران هم په د دې ملاقات په مهال موجود وو ۔
د پاکستان مسلسل ملاټر باندې د چين مننه کوؤ،فيلډمارشل عاصم منير
چين ته واپس تلو نه مخکښې خارجه وزير وانګ اي او هغه سره راغلي وفد د فيلډ مارشل عاصم منير سره هم ليده کاته کړيدي ، آئي ايس پي آر ترمخه د ملاقات په مهال د شريکې دلچسپې په معاملو د ترهه ګرۍ د مخ نيوي او د سيمې سيکيوړټۍ په صورتحال د خيالاتو بدلون شوېدے ۔ دواړو مشرانو د پاکستان او چين ترمينځ سټريټجک شراکت داري مستحکم کولو نه علاوه د امن او استحکام لپاره په سيمه ايز او نړي وال فورمز د دواړو ملکونو تعاون سيوا کولو عزم کړېدے ۔ په دې موقع د چين خارجه وزير وانګ اي وئيلي دي چې د پاکستان د ترقۍ او حاکميت لپاره به چين د پاکستان ملاټر جاري ساتي ۔ فيلډ مارشل عاصم منير د پاکستان مسلسل ملاټر جاري ساتلو باندې د چين د واکمنو شکريه ادا کړيده ۔ آئي ايس پي آر بيان کښې زياته کړي شويده چې دې ملاقات دوران د منطقې امن،استحکام او څوکالۍ د پرمختګ لپاره مشترکه کردار ادا کولو د عزم اظهار هم شوېدے ۔ د پاکستان دوره مکمل کولو نه پس خپل هيواد ته واپس تګ باندې خارجه وزير اسحاق ډار خپل هم منصب وانګ اي ته په مخه ښه وئيلي وو ۔