پهلګام حمله کښې د پاکستان خلاف د دروغو او بے بنياده پروپګنډا کونکي هند وزيراعظم يو وارې بيا مخ تورن شوېدے ۔ د هندوستان د اخله امورو پخواني وزير چدم برم هم د دې خبرې تصديق کړېدے چې پهلګام حملې په شا د نريندر مودي انتظاميې عزائم پاکستان بدنامه کول وو ۔ د هند يوې خبرې ادارے سره د مرکې په وخت چدم برم وئيلي دي چې نريندر مودي بغير د څه تحقيقاتو د پهلګام حملې ذمه وار پاکستان ګرځولي وو په دې حواله که حکومت سره څه ثبوتونه وي نو پکار وه چې هغه ئې خپل اولس ته هم په ډاګه کړي وو او دغه ثبوتونه به ئې پاکستان ته هم سپارلي وو۔
د يوې پوښتنې په جواب کښې چدم برم ووئيل چې داسې معلوميږي چې وزيراعظم مودي پهلګام حملې او د پاکستان خلاف سندور آپريشن حقائق پټ ساتل غواړي حکومتي وزيران خو هسې بيانونه ورکړي خو پارليمنټ کښې براه راست په دې معامله بحث کولو نه ډډه کوي۔ چدم برم زياته کړيده چې د هند نيشنل انوسټي ګيشن ايجنسۍ هم د پهلګام حمله کونکو شناخت نه دي کړے دا هم کيدې شي چې دغه کسان د هندوستان خپل وګړي وو او د ترهه ګرۍ تربيت ئې هم دلته کښې ترلاسه کړي وو ۔ چدم برم د پاکستان او هند ترمينځ تاؤ تريخوالې کمولو کښې د امريکې کردار نه منلو په حواله حکومتي وزيرانو په بيانونو هم د افسوس اظهار کړېدے او وئيلي ئي دي چې د امريکني صدر ټرمپ په وينا نريندر مودي د پاکستان سره جنګ بندي کړي وه او هغه په دې معامله هم قام ته دروغ وائي ۔ د چدم برم تعلق د کانګرس ګوند سره دے دې نه وړاندې هغه د غزه په صورتحال او د فلسطنيانو خلاف ظلمونو په حواله د نريندر مودي حکومت په پاليسو هم سختې نيوکې کړې وې.