د چين صدر شي جن پنګ د بيجنګ ګريټ هال کښې د پاکستان د خارجه وزيراسحاق ډار د راتګ هرکلې کړېدے، د چين صدر د ايس سي او تنظيم خارجه وزيرانو ته دې اجلاس کښې شرکت کولو باندې په خير راغلې هم وئيلي دي ۔ په دې موقع خپله وينا کښې شي جن پنګ علاقائي تعاون په اهميت او د شنګهائي تعاون تنظيم په دائره کار رڼا اچولې ده ۔
دې اجلاس کښې د پاکستان،ايران، چين،هند،بيلاروس، کرغزستان، ازبکستان، تاجکستان،روس او قازقستان خارجه وزيران شرکت کوي ۔ پاک هند او ايران اسرائيل تاؤ تريخوالي په تناظر کښې د شنګهائي تعاون تنظيم د خارجه وزيرانو اجلاس خصوصي اهميت لري ۔ د اجلاس دوران د سيمې سيکيورټۍ،نړي وال شخړو او د تنظيم د غړو هيوادونو ترمينځ اړيکو او رابطو په معاملو غور کيږي ۔
د پاکستان او هند ترمينځ جهګړې وروستو د دواړو ملکونو خارجه وزيران په وړومبې ځل يو نړي وال اجلاس کښې شريک دي ، بلخوا چين سره مشرقي لداخ شخړه او کنټرول لائن باندې تاؤ تريخوالي نه پس د هند خارجه وزير دوه زره شلم نه پس په وړومبې ځل د چين په دوره دے ۔
د دې اجلاس په سائيډ لائن به اسحاق ډار د مختلف ملکونو د خارجه وزيرانو سره ملاقاتونه هم کوي ولې د هند د هم منصب جے شنکر سره ئې د ملاقات هيڅ منصوبه نشته ۔ د ايس سي او تنظيم خارجه وزيرانو په دې اجلاس کښې راتلونکي مياشت د تنظيم د مشرانو د اجلاس تيارو په معامله هم غور کيږي،د ايس سي او سربراهي اجلاس به يوديرشم اګست نه تر يکم ستمبر پورې په تيانجن ښار کښې کيږي چې پکښې به وزيراعظم شهباز شريف او فيلډ مارشل عاصم منير هم شرکت کوي ۔