د سیمې د سولې او ثبات د بیا ټینګښت لپاره د امریکا مرستیال ولسمشر جې ډي وینس له یوه لوړپوړي پلاوي سره اسلاماباد ته رسېدلی دی. په نور خان هوايي اډه کې د هغه تود هرکلی شوی، چې فیلډ مارشل سید عاصم منیر، د بهرنیو چارو وزیر اسحاق ډار او د کورنیو چارو وزیر محسن نقوي پکې موجود وو. په امریکایي پلاوي کې د ولسمشر ځانګړی استازی سټیو ویتکوف او جیرډ کوشنر هم شامل دي، چې د دې مذاکراتو اهمیت لا زیاتوي.
د ایران د پلاوي موجودیت
تر دې مخکې د ایران د پارلمان سپیکر محمد باقر قالیباف په مشرۍ لوړپوړی پلاوی اسلاماباد ته رسېدلی دی. سرچینې وايي اسلاماباد د دواړو نړیوالو قوتونو ترمنځ د پُل رول لوبوي، چیرې چې د کلونو کړکېچ وروسته د اوربند د نهايي کولو هڅې روانې دي.
د پاکستان کلیدي رول
د بهرنیو چارو وزیر اسحاق ډار د امریکا د سولې هڅې ستایلي او هیله یې څرګنده کړې چې ټول اړخونه به په مثبت او رغنده ډول خبرې مخته یوسي. د کارپوهانو په وینا، د فیلډ مارشل عاصم منیر او امنیتي چارواکو موجودیت ښيي چې پاکستان د دې بهیر د بریا لپاره بشپړ امنیتي او ډیپلوماټیک ضمانت وړاندې کوي. جیرډ کوشنر او سټیو ویتکوف ګډون دا هم څرګندوي چې دا خبرې یوازې سیاسي نه، بلکې اقتصادي او د اوږدمهاله ثبات اړخونه هم لري.
اسلاماباد دا مهال د نړیوالو پام مرکز ګرځېدلی دی، چیرې چې له دې خبرو څخه د سیمې د راتلونکي لپاره مهمې پایلې تمه کېږي۔