د خیبر پښتونخوا په بېلابېلو ضلعو کې امنیتي ځواکونو د استخباراتي معلوماتو پر بنسټ بریالي عملیات ترسره کړي، چې په پایله کې ۲۰ خوارج وژل شوي دي. د پاکستان د پوځ د عامه اړیکو ادارې (آی ایس پي آر) په وینا، دا عملیات په باړه او بنو سیمو کې ترسره شوي دي
آی ایس پي آر
د آی ایس پي آر د ویاند له مخې، امنیتي ځواکونو د خیبر ضلعې په باړه سیمه کې د ترهګرو د شتون د معلوماتو پر اساس عملیات کړي، چې په نتیجه کې ۱۰ خوارج وژل شوي دي. همدارنګه په ډیره اسماعیل خان کې ۷ ترهګر او په بنو کې د یوې بلې جلا عملیاتو پر مهال ۳ نور ترهګر وژل شوي دي
امنیتي ځواکونو د وژل شویو خوارجو له پټنځایونو څخه وسلې او مهمات هم ترلاسه کړي دي، او په سیمه کې د نورو ممکنه ترهګرو د له منځه وړلو لپاره کلیرنس عملیات دوام لري
وزیر اعظم شهباز شریف د امنیتي ځواکونو مسلکي مهارت ستایلی او هغوی ته یې د درناوي وړ ستاینې وړاندې کړې دي. په خپل بیان کې یې ویلي چې زموږ پوځ د ترهګرۍ پر ضد د فولادي دېوال په څېر ولاړ دی او د فتنه الخوارج بشپړ ختمېدو پورې به دا جګړه روانه وي. د کورنیو چارو وزیر محسن نقوي هم د بریالي عملیاتو مبارکي ورکړې او ویلي یې دي چې د خوارجو پای به عبرتناکه مرګ وي او د هغوی مرسته کوونکي به هېڅکله ونه بخښل شي