پاکستان او د نړیوالو پیسو د صندوق ترمنځ د درې کلنې پراخې مالي مرستې پروګرام د درېیمې بیاکتنې په اړه د کارکوونکو په کچه هوکړه شوې، چې له مخې به پاکستان ته ۱.۲ میلیارده ډالر قسط ورکړل شي.
د پاکستان د اقتصادي اصلاحاتو ستاینه
د پیسو نړیوال صندوق د پاکستان وروستي اقتصادي اصلاحات، د انفلاسیون د کمولو هڅې او د تجارتي کسر د کنټرول اقدامات وستایل، خو خبرداری یې ورکړ چې د منځني ختیځ کړکېچونه او د انرژۍ د بیو بدلونونه کولی شي د پاکستان اقتصاد ته خطرونه رامنځته کړي
د پیسو د پالیسیو په برخه کې ټینګار شوی چې مرکزي بانک باید سخت مالي سیاست وساتي او د اړتیا په صورت کې د سود نرخونو د زیاتېدو امکان هم شته. حکومت د ۲۰۲۶ مالي کال لپاره د ۱.۶ سلنه او د ۲۰۲۷ لپاره د ۲ سلنه لومړني مازاد هدف ټاکلی دی
همداراز د مالیاتي اصلاحاتو، د مالیاتو د ساحې پراخولو، د دولتي ادارو د اصلاح او د لګښتونو د کمولو غوښتنه شوې، او حکومت د فساد پر ضد د سختو اقداماتو او د دولتي ادارو د خصوصي کولو ژمنه کړې ده
ټولنیزې مرستې او د خلکو خوندیتوب
په ټولنیزو برخو کې د بېنظیر عاید ملاتړ پروګرام پراخولو، د کم عاید خلکو لپاره د نغدو مرستو زیاتولو، او د روغتیا او تعلیم په بودیجو کې د زیاتوالي هڅې روانې دي
د اقلیمي بدلون په برخه کې د شنو ټرانسپورټ، د کاربن کمولو او د اوبو د مدیریت ښه کولو لپاره د چټکو اصلاحاتو غوښتنه شوې ده