د پخواني وزيراعظم عمران خان د روغتيا په اړه د اندېښنو او د پاکستان تحريک انصاف د احتجاجونو په ترڅ کې، حکومت يو وضاحتي بيان خپور کړی دی او ويلي يې دي چې عمران خان او نورو بنديانو ته د قانون له مخې پر وخت او بشپړې طبي اسانتياوې ورکول کېږي. د حکومتي سرچينو په وينا، د زندان ادارې اړين او اغېزمن ګامونه پورته کړي دي او په محکمه کې وړاندې شويو راپورونو کې هم د طبي معايناتو تصديق شوی دی.
سرچينې وايي، د سترګو د درملنې په تړاو د “۱۵ سلنه ليد” خبره ځينو کړيو بې ضرورته ډېره راڅرګنده کړې، حال دا چې دا خبره د روانې درملنې او تدريجي ښه والي په تناظر کې شوې وه. تېره ورځ د پاکستان انسټيټيوټ آف مېډيکل ساينسز او الشفا انټرنشنل روغتون د سترګو متخصصينو په زندان کې مفصل معاينه کړې او د روغتيا د پام وړ ښه والی يې تاييد کړی دی. چارواکي وايي، د دايمي زيان په اړه اوازې بې بنسټه دي او د ګوند مشرتابه او شخصي ډاکټرانو ته هم بشپړ معلومات ورکړل شوي دي.
حکومت ويلي چې د طبي معاينې پر مهال د ګوند مشرتابه ته بلنه ورکړل شوې وه خو استازی حاضر نه شو، چې دا موضوع يې د ګوند له داخلي چارو سره تړلې بللې ده. بل لور ته حکومت د احتجاجي تګلارې نيوکه کړې او ويلي يې دي چې د لارو بندېدل او ورځنيو چارو کې خنډونه عام خلک له ستونزو سره مخ کوي، نو سياسي ګوندونه بايد د ولسي خدمت او ښه حکومتدارۍ ته پام وکړي.
چارواکي ټينګار کوي چې د روغتيا موضوع بايد سياسي رنګ ونه لري، بلکې پر طبي بنسټونو وکتل شي، او اړوند ادارې د قانون له مخې خپلې دندې ترسره کوي.