په هرمز تنګي کې د دوو هندي بیرغ لرونکو تجارتي بېړیو پر ډزو وروسته د هند او ایران ترمنځ ډیپلوماټیکه ترینګلتیا رامنځته شوې ده. د هند د بهرنیو چارو وزارت سمدستي د ایران سفیر احضار کړ او په رسمي ډول یې خپل سخت احتجاج ثبت کړ، د پېښې په اړه یې د وضاحت غوښتنه وکړه
هند ویلي چې پر تهران یې ټینګار کړی څو د هندي بېړیو لپاره د هرمز تنګي له لارې د خوندي تګ راتګ اسانتیاوې سمدستي بېرته بحال کړي. د هند ویاند رندیر جیسوال زیاته کړې چې دا لارې د نړیوال تجارت لپاره حیاتي دي او باید د پخواني حالت په څېر خوندي وساتل شي. همدارنګه هندي چارواکو یادونه کړې چې ایران په تېرو وختونو کې د هند د بېړیو لپاره خوندي تګ راتګ یقیني کړی و
له بلې خوا، ایران ویلي چې د هند اندېښنې به د خپلو لوړو چارواکو سره شریکې کړي. دا پېښه په داسې وخت کې شوې چې په سیمه کې د سمندري لارو د امنیت او کنټرول په اړه ترینګلتیاوې مخ په زیاتېدو دي، چې له امله یې د نړیوال تجارت پر ثبات اندېښنې راپورته شوي دي