د ناسا د سپوږمۍ انساني ماموریت په رسمي ډول پیل شوی، چې څلور ستورمزلي یې په تاریخي سفر کې سپوږمۍ ته لېږلي دي. دا لومړی ځل دی چې نږدې ۵۰ کاله وروسته انسانان بیا د سپوږمۍ شاوخوا ته ستنېږي
د ماموریت موده او لانچ
دغه ماموریت شاوخوا ۱۰ ورځې دوام کوي او فضايي بېړۍ به د سپوږمۍ مدار وګرځي او بیا به بېرته ځمکې ته راستانه شي. لانچ د فلوریډا له فضايي مرکز څخه شوی، چې ځواکمن راکټ بېړۍ د ځمکې مدار ته ورسوله
په عمله کې درې امریکايي او یو کاناډايي ستورمزلی شامل دي، چې د لسیزو وروسته به د سپوږمۍ نږدې سفر وکړي.
اوس مهال فضايي بېړۍ د ځمکې په مدار کې ده او تخنیکي سیستمونه یې ازمویل کېږي. که ټول سیستمونه سم کار وکړي، بل پړاو به یې سپوږمۍ ته د تګ وي. په لومړي پړاو کې ستورمزلو د بېړۍ د لاسي کنټرول تمرین هم کړی، چې د راتلونکو ماموریتونو لپاره مهم بلل کېږي.
تخنیکي ستونزې
په دې مرحله کې ځینې کوچنۍ تخنیکي ستونزې هم رامنځته شوې، لکه د تشناب سیسټم ستونزه، خو چارواکو وویل چې ژر حل شوې ده
د ماموریت پر مهال به کوچني سپوږمکۍ ته ورته وسایل هم فضا ته ولېږل شي تر څو د وړانګو، لمریز فعالیت او سخت فضايي چاپېریال مطالعه وکړي. ساینسپوهان وايي دا معلومات به د راتلونکو سپوږمۍ او ژورو فضايي ماموریتونو لپاره ډېر مهم وي
د ماموریت اهمیت
کارپوهان دا ماموریت د انسان د فضايي پرمختګ یو ستر پړاو بولي، چې د سپوږمۍ دایمي حضور او ژورې فضا ته د سفر لپاره لار هواروي
دا ماموریت ځکه هم ډېر مهم بلل کېږي چې نږدې ۵۰ کاله وروسته د انسان وروستی سفر سپوږمۍ ته تازه کوي او د بشریت د فضايي پرمختګ نوې مرحله پیلوي