د پاکستان د دفاعي ځواکونو مشر او د پوځ سرلښکر فیلډ مارشل جنرل سید عاصم منیر په تېرو دوو ورځو کې په نړیواله کچه د ځانګړې پاملرنې مرکز ګرځېدلی دی. د بېلابېلو راپورونو له مخې، نوموړی په ټوله نړۍ کې په ګوګل کې تر ټولو ډېر لټول شوی شخصیت و د دې ناڅاپي زیاتوالي لوی لامل د امریکا او ایران ترمنځ د کړکېچ په کمولو کې د پاکستان احتمالي مهم رول بلل کېږي، چې نړیوالو رسنیو او سیاسي کړیو ته یې پاملرنه رااړولې ده
په نړیواله کچه د اغېزمن مشرتابه پېژندنه
د تېر یو کال په موده کې، جنرال عاصم منیر نه یوازې په سیمهییزه بلکې په نړیواله کچه د یو اغېزمن او متوازن مشر په توګه وړاندې شوی دی. په ځانګړي ډول د منځني ختیځ د زیاتېدونکي کړکېچ، د ایران او امریکا ترمنځ تاوتریخوالي، او د جنوبي اسیا د بدلېدونکو امنیتي حالاتو په رڼا کې د پاکستان رول ستایل شوی دی. پاکستان د یو “ستراتېژیک توازن ساتونکي” په توګه راڅرګند شوی او د دواړو اړخونو ترمنځ یې د اړیکو او پټو ډیپلوماټیکو هڅو کې مهم رول لوبولی دی
د امریکا په سیاسي حلقو کې هم د دې پرمختګ په اړه خبرې شوې دي. د امریکا پخواني ولسمشر ډونلډ ټرمپ د ۲۰۲۵م کال د مې میاشتې وروسته څو ځله د پاکستان د رول او مشرتابه ستاینه کړې ده. نوموړي فیلډ مارشل ته د “ستر شخصیت”، “زړور انسان” او “غوره مشر” لقبونه ورکړي دي
نړیوالې رسنۍ اود پاکستان ډیپلوماټیک رول
د ایران او امریکا ترمنځ د کړکېچ پر مهال د پاکستان احتمالي منځګړیتوب نړیوالو رسنیو ته پراخ انعکاس وموند، او دا تاثر پیاوړی شو چې اسلامآباد یو ځل بیا په سیمه کې د “ډیپلوماټیک پُل” رول ادا کوي. د کارپوهانو په وینا، دا رول یوازې لنډمهالی نه دی، بلکې د یوې پراخې ستراتېژۍ برخه ده چې له مخې یې پاکستان هڅه کوي د خپلې جغرافیایي او سیاسي موقعیت څخه په ګټې اخیستنې سیمهییز ثبات ته وده ورکړي
په همدې تناظر کې، د جنرال عاصم منیر مشرتابه د کورني امنیت او بهرني ډیپلوماسۍ د یو ګډ ترکیب په توګه کتل کېږي. د ترهګرۍ ضد عملیات، له افغانستان سره د پولې مدیریت، او په منځني ختیځ کې د توازن ساتلو هڅو پاکستان یو ځل بیا په نړیوال ستراتېژیک ډګر کې مهم کړی دی
کارپوهان وايي چې د ګوګل د لټون په رجحاناتو کې دا غیرمعمولي زیاتوالی یوازې یو ډیجیټل بدلون نه دی، بلکې دا ښيي چې نړیواله ټولنه د پاکستان او د هغه د مشرتابه رول ته په جدي توګه ګوري په ټوله کې، اوسنی وضعیت څرګندوي چې پاکستان نه یوازې په سیمه کې، بلکې په نړیواله کچه هم د یو مهم لوبغاړي په توګه راڅرګندېږي، چې پکې مشرتابه، ډیپلوماسي او امنیتي تګلارې یو له بل سره تړلې ښکاري