د پاکستان پخواني نگران وزيراعظم انوار الحق کاکړ د ډنمارک په هېواد کې له مېشتو بلوچ ټولنې سره په ملاقات کې د افغانستان او سيمې د ثبات په اړه خبرې وکړې.
هغه وويل چې په افغانستان کې د بهرنيو ځواکونو پراخ مالي او پوځي ملاتړ سره سره، هلته حکومت ژر له منځه ولاړ، چې دا څرګندوي چې د دوامداره ثبات لپاره بهرنۍ مرستې نه، بلکې محلي بنسټونه اړين دي. د هغه په وينا، اربونو ډالرو پانګه او اوږدمهاله بهرنۍ موجودګي هم د افغان دولت د جوړښت د پايښت سبب نه شوه.
کاکړ ټينګار وکړ چې پاکستان همېشه په سيمه کې د مسؤلانه سياست پر لار روان دی او د امن او ثبات لپاره عملي رول لوبولی دی. هغه وويل چې د افغانستان پېښه ښيي چې ستونزې بايد د سيمې د حقايقو او ځمکني حالاتو پر اساس حل شي، نه دا چې بهرني ځواکونه پرې مسلط کړي.
هغه زياته کړه چې پاکستان د محدودو سرچينو سره سره د ترهګرۍ پر ضد اغېزمن اقدامات کړي او د فشار سره سره يې د دولت جوړښت او ادارو ثبات وساته. د وسله والو ځواکونو او دولتي ادارو مسلکي وړتيا او ملي ژمنتيا يې وستایله او ويې ويل چې همدا استقامت د پاکستان د ځواک بنسټ دی.
انوار الحق کاکړ څرګنده کړه چې د افغانستان تجربه ښيي چې د دوامداره امن لپاره محلي ګډون، سياسي توافق او داخلي ځان بسيايي ضروري دي. هغه وويل چې پاکستان بايد د يو مسؤل، حقيقت پېژندونکي او مستحکم دولت په توګه وکتل شي چې د سيمې د امن، ثبات او رغنده همکارۍ لپاره جدي دی.
په ملاقات کې ګډونوالو د سيمې د عمومي حالت او د پاکستان د رول په اړه هم خبرې وکړې، او پخواني وزيراعظم بهر مېشتو پاکستانيانو ته د ملي يووالي او مثبت پيغام د خپرولو ضرورت ټينګار کړ.