اسلاماباد : د پاکستان د کورنیو چارو وزیر محسن نقوي پرېکړه کړې چې له لومړۍ جنورۍ څخه به اسلاماباد ته د هغو موټرو پر داخلېدو بندیز ولګوې چې اېم ټېګ نه لري
نوموړي د اسلاماباد سیف سټي د کېپیټل سمارټ سټي په بدلولو لپاره د یو جامع او مفصل پلان د جوړولو لارښوونه هم کړې ده
محسن نقوي د وزیر مملکت طلال چوهدري سره یو ځای د اسلاماباد سیف سټي مرکزي دفتر کتنه هم وکړه ، چېرته یې د ډیجیټل وال له لارې د ښار د څارنې سیستم کتنه وکړه او د نوې ټیکنالوژۍ په مرسته د امن عامه د ټینګښت لپاره پورته شوي اقدامات یې و ارزول
د کنټرول روم دننه د ځانګړي چینایي ډیسک له لارې د امنیتي څارنې نظام هم معاینه شو
د کورنیو چارو د وزیر په مشرۍ د سیف سټي په مرکزي دفتر کې یوه مهمه غونډه هم ترسره شوه چې پکې د ښار د اوسېدونکو د ځان او مال د ساتنې لپاره د روانو اقداماتو جاج واخیستل شو۔
وزیر داخله ټینګار وکړ چې د کېپیټل سمارټ سټي پر پروژه دې کار چټک کړل شي او ښاري اسانتیاوې لکه ریسکیو ۱۱۲۲، ټرافیک، امنیتي ادارې او سي ډي اېم اې دې په یوه مرکزي نظام کې شاملې شي، تر څو ښاریانو ته اغېزمن او چټک خدمتونه وړاندې شي
