لنډي کوتل: ډسټرکټ پریس کلب لنډیکوتل (رجسټرډ) کې نن د چهارشنبې په ورځ د خیبر سټوډنټس ایسوسي ایشن نوې منتخب شوې مشر عالم زیب آفریدی او پخوانی صدر او پېټرن ان چيـف رشید احمد شینواری د ایسوسی ایشن له نورو غړو سره ګډه خبري غونډه وکړه
خبري کانفرنس ته په وینا کې د پیښور پوهنتون زده کوونکو د حکومت پام د سرحدونو د تړلو له امله راګیر د خیبر پښتونخوانخوا او د ملک نورو برخو څخه تعلق لرونکي زده کوونکو د ستونزو په لور راواړول
د زده کوونکو اتحادیی مشرانو د له پاکستان او افغانستان حکومتونو څخه غوښتنه وکړه چې پاکستاني زده کوونکو ته دې لار ورکړل شی ترڅو دوی خپل هیواد ته راستانه شی او ددوی وخت ضایع نه شي
په دې موقع هغوی د خیبر سټوډنټس اسوسی ایشن د اهدافو او مقاصدو په اړه هم بشپړ معلومات وړاندې کړل او ویې ویل چې د ایسوسی ایشن بنیادی هدف دا دی چې د ضلع خیبر زده کونکو ته د زده کړو په میدان کې اسانتیاوې برابرې کړي او د دوی د ستونزو د حل لپاره غږ پورته کړي
هغوی زیاته کړه چې کې ایس اې نویو زده کونکو ته د پېښور پوهنتون د داخلې په اړه بشپړه لارښونه ورکوي، د مختلفو سرکاري او غیر سرکاري ادارو په ملاتړ د زده کونکو لپاره وړیا تعلیمي او فني کورسونه برابروي، تعلیمي او تفریحي دورې تنظیموي او د ځوانانو د کلتوري وړتیاوو د څرګندولو لپاره د “کلچر نایټ” په څېر پروګرامونه هم تابیا کوي
وروسته یې له حکومته غوښتنه وکړه چې په ضلع خیبر کې له اوږدې مودې راهیسې بند سرکاري ښوونځي دې زر تر زده پرانستل شي څو د ماشومانو تعلیمي مستقبل خوندي شي
هغوی دا غوښتنه هم وکړه چې د ګورنمنټ پوسټ ګرېجویټ کالج لنډیکوتل لپاره د زده کونکو د استوګنې لپاره جوړ شوې هاسټل دې هم بېرته فعال کړل شي، او په کالج کې موجود د بس سروس دې هم بحال کړې شي تر څو له لرې پرتو سیمو څخه راتلونکو زده کونکو د تګ راتګ ستونزه هواره شي
هغوی دا غوښتنه وکړه چې په افغانستان کې بند پاتې شوي پاکستانی زده کوونکو لپاره دې هم زر تر زر انتظامات وشی ترڅو دوی خپل هیواد ته راستان شي په خبري غونډه کې یې له وزیراعلیٰ سهیل آفریدی او مینا خان آفریدی څخه ځانګړې غوښتنه وکړه چې ضلع خیبر د تعلیم سیکټر ته دې ځانګړې پاملرنه وکړي ، ټینګار ی وکړو چې د زده کونکو د ستونزو د حل لپاره دې عملي ګامونه واخلي او داسې پخې پالیسۍ دې جوړې او عملي کړي چې ځوانان لوړې زده کړې وکړي او د ملک او قوم خدمت وکړي