Skip to content 
نیویارک — متحده ایالاتونو د ملګرو ملتونو د امنیت شورا په یوه غونډه کې د طالبانو پر فعالیتونو سختی نیوکې کړی او دغه ډله یې په بد نیت، د بشري مرستو په خنډولو او د افغان خلکو د کړاوونو په زیاتولو تورنه کړه.
د امریکا استازي وویل چې افغانان لا هم له سختو بشري حقونو سرغړونو، پراخې بېوزلۍ، بېروزګاری او پر ښځو او نجونو د سختو بندیزونو سره مخ دي.
د هغه په وینا ,,طالبان د خپلو پالیسیو له امله د دغو ستونزو اصلي لامل دي.،،
امریکا پر طالبانو تور ولګاوه چې د افغانستان د خلکو پر خیر او فلاح هېڅ پاملرنه نه کوي.
نړیوالې مرستې له سیاسي ګټو سره ګډوډوي او د افغانستان لپاره د ملګرو ملتونو د مرستندوی دفتر یوناما د فعالیت ساحه محدوده کوي. استازي د طالبانو دا چلند «یرغملپالنه» وبلله.
واشنګټن وویل چې طالبان د دوحې د توافقاتو په ګډون خپل نړیوال اهداف نه پوره کوي او له نړیوالې ټولنې سره په صادقانه ډول مخ په وړاندی په ځي.
د امنیت شورا د یوناما د راتلونکي ماموریت په اړه د بحث پر مهال، امریکا پر شورا غړو غږ وکړ چې د طالبانو په اړه باید احتیاط وکړي او د ماموریت د بیا تنظیم په اړه فکر وکړي.
د استازي په وینا ,,که د طالبانو محدودیتونه یوناما د خپلو دندو له ترسره کولو منع کړي، نو شورا باید د ماموریت د واقعیتونو مطابق بیا کتنه وکړي.،،
متحده ایالاتو یو ځل بیا ټینګار وکړ چې په افغانستان کې یې تر ټولو لومړیتوب د خپلو وګړو خونديتوب، د ترهګرۍ ضد هڅې، او د ټولو ناحقه بندیانو ژر خوشې کول دي.
امریکا په امنیتې شورا غږ وکړ چې طالبان باید د خپلو ناپوره ترهګرۍ په ضد ژمنو، یرغملپالنې، او د افغان ولس د حقونو د نهپاملرنې له امله په دوامدار ډول تر فشار لاندې وساتل شي
