ډیلاویر کې افغانالاصل امریکایي محصل ونیول شو؛ د پولیسو پر ضد د برید منصوبه ورسره وموندل شوه، د امریکا د ډیلاویر ایالت پولیسو یو افغان نژاد امریکایي محصل لقمان خان نیولی دی. د چارواکو په وینا، ۲۵ کلن لقمان خان د ډیلاویر پوهنتون انډرګرېجویټ محصل دی، او له هغه څخه داسې وسله، مهمات، بادي آرمور، دوربین او یوه یاداښتکتابچه ترلاسه شوې چې ګواکې د بریدونو تفصیلي پلانونه پکې ثبت وو. دغه وسله د مشینګن په ډول بدله شوې وه.
د پولیسو د معلوماتو له مخې، د شپې ناوخته پولیس په یوه پارک کې د معمول چیکنګ پر مهال یوه سپینه ټویوټا ټېکومه په مشکوک حالت کې وموندله. د موټر چلونکي د پولیسو له حکم سرغړونه کولو له پولیس سره د مزاحمت کولو له امله هغه نیول شوی دی.
د موټر د تلاشي پر مهال په لاس راغلې ډایري کې د پولیس سټېشن پر ضد تفصیلي برید پلان، د جګړې تخنیکونه، او د ډیلاویر پوهنتون د پولیسو د جوړښت نقشې موجودې وې، چې په هغو کې د ځانګړو دروازو او وتلو لارو نښهګذاري هم شوې وه.په ډایري کې د یو پولیس افسر نوم هم لیکل شوی و.
د لا زیاتو څېړنو لپاره ایف بي آیی هم د قضیې پلټنو ته ورګډه شوې. د فدرالي ادارې مامورانو د ملزم په کور چاپه وهلې او یوه داسې پستول یې هم په لاس راوړې چې غیرقانوني “سوئچ” پرې لګول شوی و او وسله یې په بشپړه توګه اتومات مشینګن ته بدله کړې وه
پر لقمان خان د درنو وسلو ګڼ تورونه لګېدلي دي، چې پکې د ناقانونه مجلې لرونکي وسلې ساتل او د وژونکي وسلې پټ انتقال شامل دي. چارواکي وايي چې د څېړنو تر بشپړېدو پورې هغه د پوهنتون ټولو کیمپسونو ته په بشپړ ډول بند اعلان شوی دی.
د پوهنتون ادارې ویلي چې د کیمپس امنیت نور هم سخت شوی او زده کوونکو ته سپارښتنه شوې چې هر ډول مشکوکه کړنه سمدستي راپور کړي
نورخبرونه: امریکا کې یو بل افغان د داعش خراسان ډلې سره تړاو په تور ونیول شو