د نړۍ په کچه او بیا په ځانګړي ډول په جنوبي آسیا کې د پاکستان په سیمه کې د مهم رول او ځواک له امله پاکستان ته د شانګهایی د همکاریو سازمان د ترهګرې ضد جوړې شوې یوې ادارې د صدارت څوکۍ ورکړل شوې ده او ددې څوکۍ ذمه واري هم نن په لسم د ستمبر پاکستان سمبال کړه.
د شانګهای د همکاریو سازمان د سیمهییزې ضد ترهګرۍ جوړښت مرکز په تاشقند، ازبکستان کې موقعیت لري، دا اداره د ترهګرۍ، افراطیت او بېلتونپالنې پر ضد د ګډو هڅو لپاره کار کوي . .
د پاکستان د بهرنیو چارو وزارت په رسمي ډول اعلان کړی چې هېواد یې د دې ادارې مشري پیل کړې ده. د پاکستان په مشرۍ به د غړو هېوادونو ترمنځ د امنیتي همکارۍ،د تجربود تبادلې او په ګډو اقداماتوبه تمرکز وشي. .
پاکستان به د اجرائیه کمېټې او نورو غړو هېوادونو سره په ګډه د بدلېدونکو امنیتي ننګونو پر ضد ستراتیژي جوړه کړي، او د غوره عملي طریقو له لارې به د ترهګرۍ او افراطیت پر ضد همغږې هڅې ترسره کړي.
د بهرنیو چارو وزارت ویاند ویلي، دا مشري د شانګهای د همکاریو سازمان غړو هېوادونو له خوا پر پاکستان د باور څرګندونه ده، او دا د هغو هڅو اعتراف دی چې پاکستان د سیمې د سولې او امنیت لپاره کړې دي.
پاکستان به د سایبري ترهګرۍ، معلوماتي عملیاتو، سرحدي امنیت، د ترهګرۍ مالي سرچینو مخنیوي، او د وړتیا لوړولو په برخو کې غونډې او فعالیتونه تنظیم کړي.
د بیان له مخې، پاکستان د ترهګرۍ پر ضد بېسارې قربانۍ ورکړي، او نه یوازې د خپلو خلکو، بلکې د سیمې او نړۍ د امنیت لپاره یې مهم رول لوبولی.
پاکستان دا ژمنه تازه کړې چې د سیمې او نړیوالو شریکانو سره به د ترهګرۍ ضد ګډو هڅو ته دوام ورکړي، چې دا به د شانګهای د همکاریو سازمان اصولو، نړیوالو قوانینو او د ملګرو ملتونو منشور سره سم وي . په داسې وخت کې چې پاکستان یو ځل بیا په سرحدي سیمو کې د ترهګرې ښکار دې او د ترهګري دي نوې لړې ورته ګواښونه راپیښ کړي، پوهان وایی چې د شانګهایی سازمان د یو مهمې ادارې مشري پاکستان ته ورکول لوی پرمختګ دې او دې سره به د ترهګرې په ضد ډیر ښه رول ولوبولې شي.