Skip to content 
بنو: د خیبر پښتونخوا د پولیسو د معلوماتو له مخې، د بنو په ایف سي لاین ودانۍ ځانمرګی برید چې وړمه ورځ ترسره شوې وو، د امنیتي ځواکونو او بریدګرو تر منځ د لسو ساعتونو عملیاتو په ترڅ کې ټول شپږ بریدګر وژل شوي دي
پولیس وايي، د ځانمرګي برید او وروسته عملیاتو کې د امنیتي ځواکونو شپږ سرتېري شهیدان شوي او ۱۶ نور ټپیان شوي دي چې روغتون ته انتقال کړل شول
د پاکستان پوځ د عامه اړیکو څانګې (آئی ایس پی آر) په خپاره کړي بیان کې ویلي چې “ټول د هند له ملاتړه برخمن وسله وال له منځه یووړل شول.” پوځ زیاتوي چې په دې نښته کې د ایف سي او پوځ شپږ عسکر هم شهیدان شوي. په اعلامیه کې ټینګار شوی چې “په سیمه کې به د تصفیې عملیات روان وي او د دې بزدلانه عمل مرتکبین به د قانون منګولو ته وسپارل شي.”
د بنو پولیسو په وینا، بریدګرانو د بارودو ډکه موټر د ایف سي لاین ودانۍ سره وجنګاوه او بیا یې دننه د ننوتلو هڅه وکړه. د پېښې له راپور سره سم، د بنو د ریجن ډپټي انسپکټر جنرل سجاد خان او د ضلعې پولیس مشر سلیم عباس کلاچي په مشرۍ عملیات پیل شول چې په ترڅ کې ټول شپږ بریدګر ووژل شول.
د صوبایي پولیس مشر ذوالفقار حمید د عملیاتو برخهوالو سرتېرو ته د ستاینې اسناد او نغدي انعام اعلان کړی دی.
پولیس زیاتوي چې د ځانمرګي برید له امله نږدې دوکانونو او ودانیو ته هم زیان رسېدلی دی. د عملیاتو پر مهال د ایف سي لاین دواړه لارې تړل شوې وې او شاوخوا سیمه د څو ساعتونو لپاره کلابنده وه.
یاده دې وي چې په بنو کې له دې وړاندې هم ورته پېښې شوې دي، لکه د پولیسو کمپاؤنډ او کینټ باندې بریدونه. په ۲۰۲۲ کال کې د بنو د CTD ودانۍ په پېښه کې هم وسله والو د یو اهلکار نه وسله اخیستې وه او ګڼ نور یې یرغمل کړي وو.
دلته مهمه ده او باید چې یادونه وشی چې د پرون ورځې په بنو کې د ځانمرګي برید ذمه واري حافظ ګل بهادر ډلې، جبهۃ الانصار مهدي خراسان او البدر ډلې پر غاړه اخیستې ده
