مونږ چې آزادي ترلاسه کړېده نو د دې دفاع هم کولې شو،د دښمن هر قسم جارحيت به ناکامه کوؤ،وزيراعظم شهباز شريف
اسلام آباد کښې د ځوانانو نړي والې ورځې په مناسبت يوې دستورې ته وينا په وخت وزيراعظم شهباز شريف وئيلي دي چې په څوارلسم اګست خو پاکستان آزاد شوېدے ولې په لسم مئي يو نوي پاکستان د ټولۍ نړۍ د وړاندې رابرسيره شوېدے ۔ د وزيراعظم وينا وه چې مئي مياشت کښې دښمن د پاکستان خلاف جارحيت وکړو خو د پاکستان باتور پوځ ورله داسې جواب ورکړو چې د هند ټول تکبر ئې خاورې کړو او د خپل ملک د آزادۍ او خپلواکۍ تحفظ مو يقيني کړو ۔ وزيراعظم شهباز شريف زياته کړه چې پاکستان په شپږم او لسم مئي د هندوستان د جارحيت غاښ ماتي جواب ورکړې وو دې څلور ورځني جنګ کښې مو دښمن ته داسې سبق وښودلو چې ټول عمر به ئې ياد ساتي، پاک فضائيه د څلور رافيل بشمول د هند شپږ الوتکې راغورځولې وې او ثابت مو کړه چې پاکستان يو آزاد ملک دے او د دې آزادۍ دفاع هم کولې شي ۔ خپل تقرير دوران وزيراعظم شهباز شريف د سند طاس د معاهدې ذکر هم وکړو او وئي وئيل چې د پاکستان خلاف د ناکام جارحيت نه پس نريندر مودي د سند طاس معاهدې د معطلۍ اعلان کړېدے خو د دې معاهدې مطابق هند د پاکستان د برخې د اوبو مخ اړولو اختيار نه لري ۔ وزيراعظم شهباز شريف خبردارې ورکړېدے که چرې دښمن د پاکستان يو څاڅکې اوبه هم بند کړے نو داسې سخت جواب به ورله ورکړو چې هند واکمن به توبه ويستو باندې مجبورا شي ۔