پاکستان یو ځل بیا د نړیوالې ډیپلوماسۍ د محور په توګه راڅرګند شوی، چیرې چې له نن څخه د امریکا او ایران ترمنځ د مستقیمو خبرو اترو د “اسلاماباد بهیر” رسمي پیل کېږي. د ۱۹۷۰مې لسیزې وروسته، کله چې پاکستان د امریکا او چین ترمنځ د تاریخي اړیکو لپاره لاره هواره کړې وه، په اپرېل ۲۰۲۶ کې یو ځل بیا په داسې نازک پړاو کې د اسانتیا ورکوونکي په توګه راڅرګند شوی دی، کله چې د منځني ختیځ وروستۍ اوربند ته د یوه دوامدار ډیپلوماټیک چوکاټ ورکولو یا د پراخې سیمهییزې جګړې د مخنیوي جدي اړتیا احساسېږي. لومړي وزیر شهباز شریف دا ډیپلوماټیک پرمختګ د “اسلاماباد بهیر” په نوم وړاندې کړی، او ایران هم په کې خپله مستقیمه ګډون تایید کړې ده
دا دوه اوونۍ اوږد مذاکراتي بهیر په اصل کې د ایران د لسنکاتي د سولې پلان او د امریکا د غوښتنو ترمنځ د واټن کمولو لپاره جوړ شوی دی. کارپوهان باور لري چې که څه هم سمدستي بشپړ سوله یو لوی چلنج دی، خو اصلي هدف دا دی چې محدود اوربند په داسې منظم سیاسي بهیر بدل شي چې په راتلونکې کې د کړکېچ د بیا رامنځته کېدو مخه ونیسي. په دې لړ کې تر ټولو زیات امکان د یوې جزوي هوکړې یا داسې چوکاټ ته شته چې پکې د اوربند غځول، د بندیزونو تدریجي نرمښت، سمندري امنیت او د اټومي پروګرام په اړه محدود خو عملي ګامونه شامل وي
اسلاماباد فارمیټ
د اسلاماباد فارمیټ تر ټولو لویه بریا دا ده چې دواړه سیال لوري د پاکستان په کوربهتوب مخامخ خبرو ته کښېناستل، چې دا خپله د تاوتریخوالي د کمېدو یوه مهمه نښه ده. د امریکا دریځ چې د ایران وړاندیز کولی شي یو عملي بنسټ برابر کړي، دا ښيي چې دواړه لوري اوس د یوازې پوځي فشار پر ځای ډیپلوماټیکو لارو ته هم ارزښت ورکوي. خو دا بهیر لا هم د لبنان د وضعیت له امله له خطر سره مخ دی، ځکه چې اسرائیل د ایران سره د اوربند سربېره په لبنان کې د حزب الله پر ضد عملیاتو ته دوام ورکړی، چې دا د پاکستان د پخلاینې هڅو او د ایران له هغه غوښتنې سره په ټکر کې دی چې یو باور وړ اوربند باید لبنان هم رانغاړي
ایران پر اټومي پروګرام
د خبرو مېز ته وړاندې شوي پېچلي موضوعات د ایران پر اټومي پروګرام سخت نړیوال نظارت، د بندیزونو بېرته لرې کېدل او د کنګل شوو شتمنیو ازادول دي. ایران غواړي په هرمز تنګي کې خپل رول ومنل شي، په داسې حال کې چې امریکا او اسرائیل د سیمهییزو ډلو د فعالیتونو محدودولو ته ټینګار کوي. د واشنګټن او تلابیب ترمنځ د ستراتیژۍ توپیر هم یو لوی چلنج دی، ځکه چې امریکا ډیپلوماټیک حل غواړي، خو اسرائیل د پوځي فشار د دوام پلوي دی. له دې ټولو ستونزو سره سره، د پاکستان د یوه اغېزمن پُل په توګه راڅرګندېدل د هغه نړیوال اهمیت ثابتوي، او اوس ټولې سترګې اسلاماباد ته دي چې وګوري ایا دا بهیر به په سیمه کې د دوامدارې سولې بنسټ کېږدي که نه