د نړۍ د سترو اقتصادي هېوادونو مشرانو د امریکا او ایران ترمنځ د دوو اونیو اوربند هرکلی کړی او دا یې په یوه ډېر بېثباته سیمه کې د کړکېچ د کمېدو مهم ګام بللی دی
په یوه ګډ بیان کې چې د چهارشنبې په ورځ خپور شو، د بریتانیا، فرانسې، ایټالیا، جرمني، کاناډا، ډنمارک، هالنډ او هسپانیا مشرانو، سربېره د اروپايي ټولنې او جاپان استازو د هغه ډیپلوماټیکو هڅو ستاینه کړې چې دې هوکړې ته یې لاره هواره کړې ده
د پاکستان د منځګړیتوب ستاینه
په بیان کې په ځانګړي ډول د پاکستان او نورو شریکانو رول وستایل شو چې د اوربند په اسانتیا کې یې مرسته کړې، او د نړیوالې ډیپلوماسۍ د همغږۍ پر اهمیت ټینګار وشو.
د خبرو له لارې د دایمي سولې غوښتنه
نړیوالو مشرانو وویل چې اوس باید لومړیتوب د خبرو له لارې د جګړې ژر او دایمي پای ته رسول وي، او ټینګار یې وکړ چې پایدار حل یوازې د ډیپلوماسۍ له لارې ممکن دی
د ملکي وګړو خوندیتوب او د بحران مخنیوی
په ګډ بیان کې د ملکي وګړو د خوندیتوب او د سیمهییز ثبات د ساتلو پر اړتیا ټینګار شوی، او خبرداری ورکړل شوی چې د ډیپلوماټیکو هڅو ناکامي کولی شي د نړۍ د انرژۍ سخت بحران رامنځته کړي.
د اوربند عملي کول او سیمهییز ثبات
له ټولو اړخونو غوښتنه شوې چې اوربند په بشپړ ډول عملي کړي، په ځانګړي ډول په لبنان کې یې د تطبیق یادونه شوې، او د هرمز تنګي د ازاد تګ راتګ د ساتنې پر اهمیت بیا ټینګار شوی دی بیان زیاتوي چې لاسلیک کوونکي هېوادونه له امریکا او نورو نړیوالو شریکانو سره په دوامداره تماس کې دي ترڅو د سیمې د ثبات لپاره هڅې روانې وساتي مشرانو دا ګډ دریځ د لنډمهاله آرامۍ له پړاوه د یو جامع او دایمي سولې تړون پر لور د نړیوالې هڅې ښکارندوی بللی دی.