په فاریاب کې د داعش د عید غونډه، څو مهم او لوړپوړي ترهګر هم پکې موجود وو

په فاریاب کې د داعش ضد عملیاتو په اړه پوښتنې، د مهمو ترهګرو کمانډرانو د موجودیت ادعا

کابل: د افغانستان په فاریاب ولایت کې د داعش د یوه لوی مرکز او هلته د عید په ورځ د ترسره شویو فعالیتونو افشا کېدو د طالبانو د داعش پر ضد د عملیاتو په اړه جدي پوښتنې راپورته کړې دي. د سرچینو په وینا، د فاریاب د یکه خاجي په سیمه کې دغه مرکز نه یوازې د خوندي پناه ځای په توګه کارول کېږي، بلکې هلته د لوړپوړو ترهګرو د موجودیت راپورونه هم ورکړل شوي دي.

داعش مرکز که خوندي پناه ځای؟

سرچینې وايي چې دا مرکز د قاري حکمت ډلې تر کنټرول لاندې دی، چې مشري یې د وژل شوي ترهګر قوماندان عصمت‌الله عرف حکمت خراساني زوی شفیق‌الله عرف قاري حکمت کوي.

ادعا شوې چې دغه کمپ د افغان استخباراتي ادارې (GDI) تر سرپرستۍ او امنیت لاندې دی، او همدارنګه دلته د تحریک طالبان پاکستان (TTP) د غړو د تګ راتګ راپورونه هم شته.

د عید په ورځ د ترهګرو غونډه

د راپورونو له مخې، د عید په ورځ په دغه مرکز کې یوه لویه “غونډه/پارټي” ترسره شوې، چې پکې د داعش ګڼ شمېر مهم او مطلوب کمانډران ګډون کړی و.

ویل شوي چې په دې غونډه کې د داعش خراسان مبینه امیر سیف البحر عرف شیخ مقبول، چیچن جنګیالي، او د داعش د میډیا شبکې غړي هم موجود وو.

همدارنګه ابوبکر خراسانی، د تاجکستان ډلې اړوند معاویه ابو سعد، او نور سیمه‌ییز سختدریځه عناصر هم په دې غونډه کې شامل بلل شوي دي.

د منځنۍ اسیا شبکې

په راپور کې ویل شوي چې په فاریاب کې د ځینو عناصرو اړیکې د منځنۍ اسیا له سختدریځه شبکو سره دي، چې پکې د ازبکستان اسلامي تحریک (IMU) پورې تړلي کسان هم شامل پاتې شوي دي.

د شاه‌زور خیري په نوم یو بل مبینه کمانډر هم یاد شوی، چې ادعا کېږي د قاچاقي شبکو له لارې له افغانستانه تر منځنۍ اسیا پورې اړیکې لري

د ترهګرو د انتقال ادعا

سرچینې ادعا کوي چې د سرحدي سیمو د روانو کړکېچونو له امله طالبانو د داعش، ټي ټي پي او القاعده پورې تړلي عناصر له کونړ، نورستان او ننګرهار څخه د هېواد دننه ولایتونو، په ځانګړي ډول فاریاب ته انتقال کړي دي په دې توګه فاریاب د یوه مهم مرکز په توګه یادېږي، چیرې چې د ګڼو جنګیالیو د راټولولو ادعا شوې ده

د طالبانو د ادعاوو پر وړاندې پوښتنې

طالبان تل ادعا کوي چې دوی د داعش پر ضد عملیات کوي، خو دغه وروستي افشا د هغوی د ادعاوو په اعتبار جدي پوښتنې راپورته کړي دي

د سیمه‌ییز امنیت لپاره ګواښ

شنونکي وايي چې په فاریاب کې دا ډول فعالیتونه یوازې د افغانستان ستونزه نه ده، بلکې د ټولې سیمې لپاره ګواښ دی.

د پاکستان، منځنۍ اسیا او نورو ګاونډیو هېوادونو لپاره دا پرمختګ د امنیتي اندېښنو د زیاتېدو سبب ګرځي، په ځانګړي ډول په داسې وخت کې چې د پولې هاخوا ترهګري لا هم یوه جدي ننګونه ده