د خیبر پښتونخوا د باچا خان پوهنتون په فارمسۍ څانګه کې د هندوستان ملي سرود ویلو او شعارونو وهلو په تور څلور زده کوونکي سمدستي له پوهنتون څخه ایستل شوي دي. دا پرېکړه د پوهنتون د انضباطي کمېټۍ په ۷۳ مې غونډه کې شوې، چې د پېښې د جديت په نظر کې نیولو سره یې د سختو تادیبي اقدامونو سپارښتنه کړې وه.
د پېښې له مخې، تېره ورځ په پوهنتون کې ځینو زده کوونکو د هندوستان ملي سرود وړاندې کړی او شعارونه یې وهلي، چې ویډیو یې وروسته په ټولنیزو رسنیو کې خپره شوه. په دې پېښه د عامې او تعلیمي ټولنې له خوا سخت غبرګون ښودل شوی، او پوهنتون ادارې سمدستي د انضباطي کمېټۍ اضطراري غونډه را وغوښته.
کمېټۍ د ویډیو شواهدو او لومړنیو څېړنو پر بنسټ د فارمسۍ څانګې څلور زده کوونکي ګناهکار وبلل او د هغوی د اخراج حکم یې صادر کړ. د ادارې له لوري په خپور شوي رسمي خبرپاڼه کې ویل شوي چې د یادو زده کوونکو د هستوګنې الاټمنټ هم سمدستي لغوه شوی او هغوی ته د پوهنتون له حدودو د وتلو لارښوونه شوې ده.
د پوهنتون چارواکو دریځ خپل کړی چې د تعلیمي ادارې له نظم او ملي وقار سره هېڅ ډول جوړجاړی نه شي کېدای.