د ارمان لوڼي د شپږم تلین په مناسبت غونډه کې، د پښتون ژغورنې غورځنګ پي ټي ایم مشر منظور پښتین ادعا کړې ده چې په تیراه وادي کې او د خیبر پښتونخوا په نورو سیمو کې روان پوځي عملیات پر ملکي وګړو سخت منفي اغېز لري
د پي ټي ایم یوکې له خوا خپرو شوو څرګندونو کې پښتین وویل، که څه هم چارواکي دا عملیات استخباراتي بنسټ لرونکي بولي، خو لرې پرتو کلیو او غرنیو سیمو کې ورانۍ، د خلکو ورځنی ژوند ګډوډ شوی او د ماشومانو او ځوانانو لپاره د خطر کچه لوړه شوې ده
نوموړي زیاته کړه چې دا وضعیت د زدهکړو، امنیت او ټولنیز ثبات بنسټونه کمزوري کوي او له دولتي ادارو یې وغوښتل چې د عملیاتو پر مهال له احتیاطه کار واخلي، دقیق هدف ټاکنه وکړي او د ملکي وګړو خوندیتوب ته لومړیتوب ورکړي۔
منظور پشتین پر سیاسي، پوځي او اداري چارواکو، د پارلمان پر غړو او ځایي جرګو غږ وکړ چې د خلکو د حقونو د ساتنې، شفافیت او پرمختیایي پلانونو کې د ولس د ګډون د یقیني کولو لپاره لا فعاله رول ولوبوي
هغه د یووالي او ګډ مسؤلیت په ټینګار سره وویل چې د پي ټي ایم دریځ دا دی چې دوامداره سوله یوازې هغه وخت شونې ده چې د دولت او ځایي ولس ترمنځ باور رامنځته شي۔
استخباراتي عملیات او د سخت دریځې شالید
بل لور ته، د پاکستان امنیتي چارواکو د منظور پښتین دا ادعا رد کړې او ویلي یې دي چې روان اقدامات بېهدفه نه، بلکې استخباراتي بنسټ لرونکي عملیات دي چارواکي وايي چې په تیراه او د خیبر پښتونخوا په نورو سیمو کې عملیات د هغو وسلهوالو پټنځایونو پر ضد ترسره کېږي چې له پولې پورې غاړې بریدونو او دوامدارې ناامنۍ سره تړاو لري
د امنیتي ادارو په وینا، د ملکي وګړو د ساتنې تګلارې د هر عملیاتو مهمه برخه ده او هڅه کېږي چې عملیات محدود، دقیق او هدفمند وي، نه پراخ او سزا ورکوونکي ، چارواکي ټینګار کوي چې یوازې د امنیتي اقداماتو له امله رامنځته شوې ظاهري ستونزې یادول د وسلهوالو شبکو هغه بنسټیز ګواښ له پامه غورځوي چې په سختو غرنیو سیمو او پرانیستو پولو کې فعالیت کوي
د ۲۰۲۵ کال په اوږدو کې، امنیتي ځواکونو په ټوله صوبه کې لسګونه زره استخباراتي عملیات ترسره کړي او زرګونه وسلهوال یې له منځه وړي، چې چارواکي یې د ژورو ریښو لرونکو پټنځایونو د له منځه وړلو دوامداره هڅه بولي.
بیا رغونه، پرمختګ او د ثبات لاره
چارواکي همدارنګه وايي چې په خیبر پښتونخوا کې ورګډو شویو ضلعو او جګړه ځپلو سیمو کې د ولس لپاره موازي اقدامات روان دي۔ په دې کې د بیا مېشتېدو او تاوان ورکولو پروګرامونه، د سړکونو جوړول، ښوونځي او روغتیايي مرکزونه شامل دي، چې موخه یې د عادي ژوند بېرته راګرځول او دوامدار پرمختګ دی
امنیتي چارواکي مني چې بېکوري او ستونزې شته، خو وایي چې دا زیاتره د وسلهوالو د اوږدمهاله شتون پایله ده، زیاتوي چې دا د دولت ارادی کار نه دې چې خلک ستونزو سره مخ کړي بلکي ریاست غواړي د خلکو ژوند خوندي او ترهګر له منځه یوسي
د چارواکو په وینا، په تیراه او ټوله خیبر پښتونخوا کې دوامداره سوله هغه وخت شونې ده چې وسلهوال پټنځایونه له منځه ولاړ شي، حکومتي واکمني پیاوړې شي او ولس ته د پرمختیایي چارو په پرېکړو کې ریښتینی ګډون ورکړل شي۔
که څه هم د سیاسي خوځښتونو او مدني ټولنې رغنده رول مهم بلل کېږي، خو امنیتي چارواکي خبرداری ورکوي چې هغه بیانیې چې سخت دریځ او ترهګري له پامه غورځوي، د بېثباتۍ اصلي لاملونه پټوي او د تلپاتې سولې بهیر ځنډوي